Vum Schöne u Guete - vum Läbe - "I weiss grad nid" - und witere verruckti Zile i veruckte Zyte

I weiss grad nid

I weiss grad nid, was mit mir passiert

I weiss nid wurum und wieso

Dass das jz grad so isch use cho

Viellicht sött i nid z'viel Frage stelle

Dir gredi use da dervo verzelle

u eifach nume gspühre was isch

und nid vergässe, z'gniesse was grad isch

Es cha passiere

nid grad jede Tag

 

Klar chönnt mängs no besser si

Klar chönnt mängs no schöner si

Doch wurum wei mir immer meh

U wei s'Schöne so wies isch nid gseh

Dis Lächle isch so wunderschön

Dis Strahle tuet mir guet

Ire Wält wo mängs nid so isch wie nes sött

Tüe Lächle u Strahle nume guet

Gäu me seit "I ma di guet schmöcke"
Das seit doch eifach i wetti jez am liebschte
ganz ganz nach bi dir und mit dir zäme si
d'Luscht ar Luscht und
d'Freud ar Freud
isch doch das was üs verbindet, gäu ?!

Mir sötte - auso nume we mir würklech wei

Chli meh Zyt ha fürenand

Zyt zum Lose, Luege und Verzelle

Zyt zu häbe, striichle

u chli zärtlech si

Und wär weiss, viellicht no chli meh

Egal wie jung, egal wie alt Das alles isch doch so wunderschön wes vu Härze chunnt und ehrlech isch

I gloube jez tanzed grad mis Härz

vor Glück u Freud

dass i di kenne, dass du da bisch

U mis Härz seit da derfür

da derfür, da dank i dir

Es isch schön wüll's schön isch Es isch guet wüll's guet isch All das isch wie's isch wüll du wieder i mis Läbe cho bisch

.... scho gli meh a däre Stell

Ha kä Luscht und anderi doch eher luschtvolli Gedanke, Tröimereie und Fabulierereie

20.10.2026

I bi nid stouz e Schwizer z'si Wüll da derfür da cha ni ja nüt Aber i bi glücklech dörfe i däm schöne Land z'wohne, mini Arbeit z'ha, mini Familie und mini Fründe z'ha

Ha kä Luscht Ha kä Luscht uf Lüt wo kä Luscht hei Ha grossi Luscht uf Lüt mit grosser Luscht am Läbe, ar Liebi, am Zäme si, am fürenand

"Neutralitäts"-Initiative -- NEI !! D'Abschtimmig isch jez verbi Das isch wieder mau e ganz e schöne Sunntig gsi D'SVP het ume eine uf der Deckel übercho I wünsche mir für Zuekunft no viel meh dervo

S'wird irgendwie dunkler uf däre Wält Nid wüll der Winter scho bald vor der Türe steit S'wird dunkler wüll so viel Lüt so voll vu Hass si i däne Täg Und extrem gäge rächts dranne si vieles wo mir erschaffe hei Eifach z'zämeschla ! Unfassbar wie so öppis eifach möglich isch.

Es isch mir als ob mir uf däm Planet wäre wie wenn mir nume churz i de Ferie wäre. Lande, Stoub ufwirble Dräck la ligge schnäll d Kofere packe u wieder hei Doch isch dehei nid der genau glich Ort wie dä vu de Ferie ?

S'git jetzt Mönsche nid irgendwie Schwurbler oder so wahrhaftigi Experte i ihrem Fach die meine, dass - wenn das so würd witer ga mir alle scho gli platt u flach denn die KI wird langsam sälber gschid u wird viellicht bald merke dass s'einzige für's Wohl vu däre Wält e Wält ganz ohni Mönsche wär

In Dütschland hei sich d'WählerInne imne Bundesland ziemlich vergriffe bim wähle u hei leider nid begriffe Was sie sich sälber und ihrem Land da dermit a ta hei u fasch alles eifach nume no viel viel schlimmer mache

wo ni Chind bi gsi het me mir gseit: dr Lieb Gott wird luege dr Lieb Gott wird hälfe dr Lieb Gott wird bi dir si Wo ni grösser, älter und erfahrener bi worde ha ni gmerkt: s Wort lieb das chasch mal striiche Weisch, wenn öppis id Hose geit de säge si dir, es isch halt Gottes Wille !

Wär nümm wott tröime Wär nümm cha tröime Dä wunderschön Troum vumne guete u schöne Läbe für alli wo nach üs chöme und ou no s'Rächt wei ha z'tröime vumne guete Läbe Drum lueg zu de Mönsche Lueg zur Natur Lueg guet zum Klima Und lueg dass Demokratie nie cha usstärbe

S'isch Zyt, dass mir däne, wo meine dass si üs mit Abstimmigs-Falsch-Informatione chönne choufe, zeige, wie mir derzue stöh u wie üses wahre Schwizer Härz schlaht Nei !! zur "Neutralitäts-Initiative"

Mi störts nid was d'Lüt über mi säge we das wo sie säge das isch wo i würd säge wenn i eine wär wo so Sache über mi würd säge

S‘Glück het kei Farb und kei Gschmack S‘Glück isch eifach für di da Muesch es wenn‘s chlopfet eifach nume ine la

Uf der Strass gö d'Hünd mit ihrne Meischter a der Leine Uf und Ab bis keis Böuimli me ungschmöckt uf em Trottoir steit. D'Chind strecke ire Grind neugierig zum Wägeli us u d'Mammis tröime vu hüt u geschter

U gschpühre immer feschter, das Läbe da das chame läbe la aber s'hätt sicher irgendwie und irgendwo ou es anders gha

Eine us der Zyt vur Pandemie S'git gägewärtig Lüt die wei eifach nid verstah dass es Lüt git wo gägewärtig Freud am Läbe chöi ha

EVERGREEN S’isch mängs nümm so wie’s früecher isch gsi doch i frage mi, isch’s denn würklech so viel schöner gsi S’het jedi Jugend ihri Zyt u jedi Zyt het ihri Jugend S’isch mängs nümm so wie’s früecher isch gsi Aber es isch e so und so sölls si

Eine für am Abe Voller Stolz und voll vu Freud Geit dä Tag am Ändi zue Är hofft dass du ihn gnosse hesch Und wünscht dir schöni Abe Rueh

Mi Wunsch Dä wunderbar neui Tag Isch ume eine wo ou di hüt bsunders mag

Bisch du glücklech wenn du lächlisch oder lächlisch eifach so Egal eigentlecht. Wenn du lächlisch macht mi das froh

s Buskers Bärn isch jez verbi schön isch’s ou das Jahr gsi mängisch e chli es Gschtungg und es Drück ha glich geng es guets Plätzli gha - zum Glück

Der Jazz Trumpeter trumpetlet e chli vor sich häre. Die andere vu däre Bänd probiere ihre Teil derzue bi z trage. Sie chöis fei e chli guet, zäme u i voll im Takt So dass mis Bei e chli wippet wülls mi dermasse packt

Damit i nid so alleini bi, ha ni mir hüt e chlini härzige Stube-Flöige zuche ta. U dass sie nid so einsam isch, ha ni ou no grad es Männli derzue poschtet.

Ha mir grad us de Tröim i dä neu Tag ine kämpft. Weiss grad no nid, wo dass i am Beschte söll blibe. Im Tag oder i de Tröim. Der Caffee wirds richte.

du muesch gar nid viel verzelle i weiss scho viel, scho gnue wenn i di gseh du chasch jez eifa e chli si chli di si mit all däne gfüehl u füehle i bi eifach für di da

E guete Tag Wünsch ich Dir Eifach so Und wüll ich dich mag Viellicht mal eine E ganz e feine Ohni News vu diesem u vu däm E ruehige ganz ohni Lärm

Eine mit viel chline Sache Wo Du chasch schmunzle Wo du chasch lache Weisch ohni Sorge, ohni Runzle Eine wo Dini Gedanke Chli chöi ruhig wärde Eine wo Dini Seel Fröhlech wird u chli wott tanze

am sächsi wird gässe am sächsi gits Znacht fertig Schnätz

I ha Mönsche gärn Eigentlech und überhoupt Ämu die Meischte I ha Schwizer gärn Prinzipiell und ganz generell Aber i ma Schwizer de öppe gar nid we sie meine, dass richtigi Schwizer nume die si wo gliich dänke u gliich abstimme u am beschte no mit der Hellbarde id Badi gö Die ma ni gar nid

da isch so nes wunderschöns Irgendöppis zwüsche Schwarz und Wiiss da isch so nes wunderbar Magischs zwüsche Himmel und Höll da isch so nes unheimlich Vibrierends zwüsche dir und mir i wünsche mir genz fescht dass das witer so flatteret morn u übermorn u de luege mir de witer

I findes super mega guet wenn Mönsche sich mit Sunnecreme tüe schütze derige wo guet tüe nütze I findes aber ziemlich gruusig, wenn all die Creme a däne Mönsche so unterschiedlich parfümiert tüe vor sich häre stinke

ha hüt wieder mau is Honigtöpfli gluegt jetzt gseht me scho der Bode

Es donneret. Es donneret und grollt so schön. Wie wenn da obe eine oder ischs e eini würdi säge: Passet uf da unde ! Tüet nid z'schtrub S'meischte het irgendwo e Grund

Dr Flughafe, e Ort wo nur so strotzt voller Intensität Da gits es Ufenanderträffe vu all däne Gfüehl u Stimmige Abflug, Akunft, eifach so Willkomme, Abschied Freud, Truur Alles uf so ängem Ruum Hoffnig, Zueversicht Angscht Mönsche wo sich churz begägne ohni sich würklech z‘begägne Flughafe

Eine vu früecher ... Wurum chöi mir nümm schtriite, chäre, zangge ? Chuum isch me sich nid einig gits es Gränn vu wäge Schpaltig ir Gsellschaft, Schwiz, Wält oder so Schtritte isch guet, tuet guet ... klar nid geng Aber eifach immer immer mit Stil und Niveau u re Chinderstube wo sich laht gseh

Wär gäng mues betone, dass är/sie sälbschtständig chönn dänke betont das wahrschinlech drum so heftig wüll är/sie sälber no gwüssni berächtigti Zwifel hei. Sälbschtständig dänke cha me nur uf Basis vu erlerntem Wüsse. Was me cha, si d'Quelle derzue sälber wähle.

D'Natur isch froh isch ändlech e chli Räge cho D'Ärde wird gäng trochener D'Ärde wird gäng chli wärmer S'geit zwar alles ziemlich langsam aber trotzdäm viel viel z'schnäll

es stört mi scho chli dass du störsch weisch ganz genau dass du grad nid hie häre ghörsch

Die einte si arm, die andre rich doch i eim da si mir alli glich mir sehne üs e chli nach Liebi nach öpprem wo eim eifach gärn het mir sueche alli e chli Wärmi und e Hand wo üs ganz fescht hebt denn wenn mes brucht, wenn's nötig isch und i dänke dass du das bisch

Hass - wohär chunsch du ? Hass - wohäre geisch ? Hass - vu was ernährsch du di ? Hass - merksch nid, ohni di viel mehr Spass ?

Da gits all die Gfahre für üs Mönsche. Dr Klimawandel wandlet z'schnäll, di Chriegi überall + die mächtige Männer wo da derzue viel z'mächtig si. Die KI wo üsi Arbeitsplätz tuet bedrohe, wo üs ch überwache überall. Doch z'schlimmschte isch, dass es viel z'viel Mönsche git wo's gar nid interessiert

Wüsse die, dass mir‘s wüsse, dass sie‘s wüsse ?

Wüsse die, wo wüsse, dass mir s'wüsse, dass mir wüsse, dass sie's wüsse ?

i ha Freud i ha eifach nur Freud i ha Freud ar Freud

Läck het das guet ta Fitness, Sauna trallala I gspühre wieder überau all die Müskeli - nid normau I gloub i gange morn grad no nes mau

Wüsse die, dass mir‘s wüsse, dass sie‘s wüsse -- und anderi bärndütschi Tegschte für di zäme bigelet

meh Bärn-Fotos

D'Natur isch froh isch ändlech e chli Räge cho D'Ärde wird gäng trochener D'Ärde wird gäng chli wärmer S'geit zwar alles ziemlich langsam aber trotzdäm viel viel z'schnäll

Es stört mi scho chli dass du störsch weisch ganz genau dass du grad nid hie häre ghörsch

Die einte si arm, die andre rich doch i eim da si mir alli glich mir sehne üs e chli nach Liebi nach öpprem wo eim eifach gärn het mir sueche alli e chli Wärmi und e Hand wo üs ganz fescht hebt denn wenn mes brucht, wenn's nötig isch und i dänke dass du das bisch

Hass - wohär chunsch du ? Hass - wohäre geisch ? Hass - vu was ernährsch du di ? Hass - merksch nid, ohni di viel mehr Spass ?

Da gits all die Gfahre für üs Mönsche. Dr Klimawandel wandlet z'schnäll, di Chriegi überall + die mächtige Männer wo da derzue viel z'mächtig si. Die KI wo üsi Arbeitsplätz tuet bedrohe, wo üs ch überwache überall. Doch z'schlimmschte isch, dass es viel z'viel Mönsche git wo's gar nid interessiert

Wüsse die, dass mir‘s wüsse, dass sie‘s wüsse ?

  
i ha Freud

i ha eifach nur Freud

i ha Freud ar Freud

Läck het das guet ta Fitness, Sauna trallala I gspühre wieder überau all die Müskeli - nid normau I gloub i gange morn grad no nes mau

u gäng wie gäng ...

Wär sich nur mit Gliichgsinnte umgit Mönsche wie Meinige Verpasst die anderi Häufti vum Läbe

Tue mir doch uf Bluesky folge - i freue mi

https://bsky.app/profile/drruedubaern.bsky.social

 

I ma dis Lächle - i ma dis Strahle u anderi Gedanke in Gedichtform

 

I ma dis Lächle

I ma dis Strahle

I ma dini Fründlechkeit

I ma dis Lüchte

Du - liebe neue Tag

wo mi empfaht jez grad

Du bisch so wärtfrei

Du bisch so offe

Aber i weiss, dass scho ganz gli

bim erschte Läse vu all däne News - de isch das de leider furt u verbi

* * * * * * * *

z viel Bier z viel Wii z viel Kafi mit oder ohni Schnaps --- meh Tee meh viel meh meh Wasser mit oder ohni Blöterli --- meh Freud schmärzfrei und ohne Droge vum Morge früeh bis früeh am Abe

* * * * * * * *

S'hei einigi vur SVP gmeint der Trump sig guet für d'Schweiz Wurum gits geng no Lüt wo meine d'SVP sig guet für d'Schwiz ?

* * * * * * * *

i lose wieder mau Nachrichte u dänke u dänke u dänke doch sie lose niid uf mi

* * * * * * * *

Mir stöh i der Schlange mir stöh u stöh u stöh u plange wüsse zwar nid genau uf was wüll die einte so u die andre andersch Houptsach mir stöh und plange

* * * * * * * *

Dürestarte statt warte eifach nümm so ume plämperle i weiss du packsch es i weiss du bringsch es i weiss dass ou du weisch dass i weiss

* * * * * * * *

Chumm mir lösle zu dir oder zu mir oder löh mir's viellicht gschider no la si --- Chum mir luege wo's üs häre tribt Du hesch schmunzelnd gmeint es isch nie z'spät --- Viellicht isch es jez so wit Du und i

* * * * * * * *

Wär realisiert u akzeptiert, dass är nid alli Mönsche cha gärn ha Merkt de ou, dass es sicher besser isch, wenn eim nid alli Lüt gär hei Macht irgendwie frei

* * * * * * * *

Wär hützutags vor em Bundeshuus demonstrativ Hellebarde treit Heit vu vielem kei Ahnig und merkt nid, wohär der Wind i däne Tage weiht

* * * * * * * *

I sött ändlech mau lehre, mir bi mine Sälbschtgesprächbchli besser zue z‘lose.

* * * * * * * *

I sitze wieder mau im Zug u fahre Zug um Zug nach Zug, Olte oder so Houptsach z‘fride u froh was ja i däne strube Tage nid sälbschtverständlich isch liit eim ja dieses oder eis übel uf em Mage

* * * * * * * *

Die ewig Geschtrige verharre ire Zyt wo nieme so wird si wie si isch gsi wo sie no schön u guet isch gsi

* * * * * * * *

So cha das nümme witerga. Wär söll das verstah? Jez isch de gnue Heu dunde. I has ja scho immer gseit. Es söll ändlech öpper öppis mache. --- I mache jez e Pouse.

* * * * * * * *

D'Abstimmig die isch jez verbi Das isch wieder mau schöne e Zanggerei gsi Die einte hei wöue der SRF ihri Flüge stutze Die andere si klar degäge gsi D'SVP het ou hie eine uf e Decku übercho doch leider hei sie ou diesmal no nid gnue dervo Si die eifach so fruschtriert u ohni Zfrideheit ?

* * * * * * * *

Bi grad irgendwo im Irgendwo bi nid e mau so unwohl so I schwäbe ab mit mim Dänke Gedanke wo nid so guet cha länke Sie spiele grad wie wild mit mir irgendwo zwüsche dir und mir

Tue mir doch uf Bluesky folge - i freue mi

https://bsky.app/profile/drruedubaern.bsky.social