Vu Umkleidekabine u Internet-Schopps

Weisch Du eigentlech, wurum dass soo vieu Lüt lieber iri Chleider im Internet schtatt im Lade ir Gass unge poschte.
Nei ... nid öppe wüe si Angscht hätte vor de Umchleidekabine - weisch wüe die z'äng chönnte si. Nei die Lüt schätze haut die ganz initime Ambiente de hei vor em Chuchi Tisch u haub offene Chüeschrank. Det muesch de di Buuch nid so müehsam u beschwärlech ine zieh. Chaschs eifach chli la gah, i jeder Beziehig. U we de die neue Hose so richtig schön iigfürzlet si u du ume es gruchloses Selfi gschosse hesch u das au diner Fründe ou mit amne Smeili oder so bewärtet hei, denn chasch die Hose wider iipacke u zrügg schicke. S'sig dir nid so rächt gange oder so. Aber einisch hei si no dörfe. I Usgang mit dir, is Büro oder am Abe id Beiz oder i Klub.
U scho isch die nächschti Liferig ungerwägs u der Chüeschrank wieder haub vou u der Chuchitisch schön süberlech parat für's uspacke. U weisch der absolut Hammer isch ja ... glette meusch so ou nümme. Weisch wie schön. So hesch meh Zyt für im Internet u i däne Schopps umezfüdere u Klick Klack hesch di wider entschide. U we's de hert het mit de Entscheidige, de bschteusch haut grad drü oder vier - eh ja - we de Pöschtler ja äxtra mues cho.

U hesch das ou scho erläbt, dass de - chuum isch di Liferig deheime acho - scho grad es Meil überchunnsch u du grafgt wirsch, ob de zfride bisch mit der Liferig u de chläbt so ne virtuelle Kuhpon im Mail. Überchunnsch grad chli Rabatt für die nächschti Bschtellig. Eifach dass de immer schön dranne blibsch am bschteue. Oh isch das doch schön i de richtige Läde mit richtigem Presonau. Die si ufgschteut u fröhlech oder lö di eifach o la si. Aber si närve vieu weniger aus di mühsame Akzione vu däne Marketing u Seils Heinis.
U we de schribsch si söue di doch eifach e chli in Rueh la, de heissts so salopp, dass das mit däne Nachfass-Meils e outomatisierte Prozäss sig u da chönn me nüüt mache. Ja hallo, ou scho mau öppis vu Informatik u programmiere ghört ? Me cha aus - we me wott. Nume sött mes zue gäh, dass me äbe nid wott.

Vu Eier u Chuefläde

Hüt bisch nume no öper, we de tuusigi wenn nid gar Millione vu Follouer uf Inschta hesch. Weisch.
S'zeut nume no wenn de gleikt wirsch. Das isch s'Mass vur Liebi wo dir die Wäut no cha gäh.
Mir si haut ire Zit wo es Inschta-Ei so wichtig wird, dass die haubi Wäut drüber redt u du es absoluts Nüüt bisch, we Dir das nid bekannt isch. Das Ei, meini. Weisch. U wüe i haut o so nes Säubschtwärt Gfüeh ha bini uf d'Suechi i mim Fridhof vu Föteli wo niemer me aluegt oder sich derfür intressiert. U Du gloubsch es nid, i ha eis gfunge. Dr Chüeflade oder Chüeplätter wie me nim ou seit isch füre cho u het sich are chline Verschönerigskur la unterzieh. U jezt geit dä Gagu viral, ämu hie. U sött ig de so drü bis vier Leiks übercho - ja das wäre eifach nume schön u würd mire Seel fei e chli büsele. Auso ... hiuf bitte mit u da derfür tue ni dir danke. Scho jezt, we ni no kei Promi oder Inschta Schtar bi. Ha grad no chli gäbig vürig Zyt derzue u gniesse die Rueh vor däm Schturm.

Vum töipele i politische Frage u de chline Freudeli

Jez schtimme mir de über die Zersidligsinitiative ab. Ume mau e nid ganz eifachi Frag wo mir da sötte die richtigi Antwort derzue ha. Es geit wie bi so vilem haut immer ou um Zuekunft. Nid nur vu üs, sondern ou vur nächschte u übernächschte Generation. U da tüe mir - ämu viu Lüt - immer ou ganz guet hin und här überlege. Seriös dänk. u zum Glück.

U jez het me chönne läse, dass die Initiative villicht Schanse hätti, wüe da ou es paar SVP-ler derfür sige. U die Initiative chunnt ja useme ganz lingge u grüene Egge.

U wüe das die Lingge u Grüene nid gärn hei, we d’SVP i irer Nechi isch, chönnt das ou wider vieu vu däne derzue bewege, grad äxtra nei z’säge. Weisch - eifach nume wües ou chli rächte Mief drann hätti. U das tät huere weh - meine si.

S’git so vieu Lüt, die chöi nid der Sach na Politik mache. Nei - die bruuche immer s’Findbieud um glücklich z’sieh u nes Freudeli z’ha.

Bringt üs aber aui nid vieu witer. Bi däre Frag u ou bi angere. U umgekehrt isches ja überhoupt nid besser - bhüeti. I gloube, so isch es. Baschta.

Statt rubble wie Tuble

I däm Niusletter vu däm Grossverteiler, wo hüt uf em Biudschirm vu mim Kompiuter erschine isch, da isch gschtande, dass i mi Kassebon eifach nume mues iscänne u de gwinni. „Jetzt Kassenbon scannen und gewinnen“. Hesch dänkt. I ha gmeint, schtatt rubble wie Tuble eifach nume ganz bequem iscänne u de hesch es. Uf Garantie. Aber nüt da! Bi äxtra am Sunntig nach Bärn i Bahnhof u dört de füfzäh mau ar Kasse verbi, ha jede Artiku einzu kouft u has uf mi gnoh, jedes mau di Warteschlange hinger mi z’bringe. Füfzäh mau scännet u füfzäh mau Härzchlopfe wines jungs Hündli im Schnee - das isch scho fasch wie Fitness Träning vum schtrübere gsi, aber geng nume öppis - nämlech eifach nume nüüt.

Der Proschpäkt i mim Briefchaschte

I ha zwar e Chläber, dass ig keiner Proschpäkte wöu. Aber da het sech haut eine i Azeiger inegschliche. Vu so Apotheke chunnt dä u i ha de gliich e chli afa umeblättere und schneugge. U scho bau ha ni de gmerkt, dass es öppe no schlau wäri für ne Mönsch so wi ni, nid grad aues für bari Münze znäh. Ha drum plötzlech bim Läse so komisches Hausweh übercho u d'Nase het grüselig afa loufe. Fasch derfo glüffe wär si. U i ha ne riesige galoppierende Pues übercho, wo ni vu de Gfahre vur Schlaflosigkeit gläse ha, obwou i ja eigentlech süsch ganz guet schlafe. Ha de grad no sofort die nöii Äpp gäge Bluethochdruck abeglade aber de nid gwagt ine zluege. Chönnt ja no si, das i sofort is Schpitau müessti gah. I suuffe ja nümme, rouche scho es Zyttli nümm, mache Sport wie nes jungs Rehli oder e aute Bock, isse kei Sauz meh u mache der ganz räschtlech Tag nume no Ruehe Pouse. So schteits gschribe. So söu das si. Aber eis weis i ganz sicher. E Thriller zum läse entschpannt mi meh aus serig Heftli.

Hüt ha ni wieder mau gwöschet u glettet

Hüt ha ni wieder mau gwöschet u glettet u derbi e chli zum Fänschter us u über d'Decher vu mim Quartier i d'Schtadt use gluegt. Ja bi üs isch d'Wöschmaschine im füfte Schtock u d'Usssicht prächtig. Bi schönem u bi wüeschtem Wätter u hüt grad erscht rächt, wüew da neu Schnee uf de d'Dächer vu Bärn eifach es schöns Bieud git. U sisch mir derbi chli Musig düre Chopf vu Ohr zu Ohr umetrohlet. Musig vu de Patänt Ochsner vu Bärn u däne wunderbar schöne u poetische Tegschte. U wües Wätter hüt äbe chli Wätter zum dinne bliibe isch, ha ni mir vorgno, d Gitarre füre znäh u säuber e chli probiere Liedli z mache. Ja u gnau uf das freu i mi u fah jetzt de grad sofort a.

Hüt ha ni überleit vu wäge guete Vorsätz

Hüt ha ni zerscht mau müess usschlafe. Het guet ta u der Buuch isch no am Morge vou gsi vu däne feine Sache. U de bi ni husch no schnäu i Fitti chli ufs Loufband u ha zerscht gmeint, es chönnt de üppe vieu Lüt ha wäge de guete Vorätz. Vergiss es. Bi auö eifach z früeh ar Pforte gschande. U de ha ni öppe füf Schtund Gitarre und Compi-Musig gschieut u baschtlet u güebt u de ha ni mir der Vorsatz gno, dass Jahr, we's doch scho so guet schtartet, keiner Vorsätz z'fasse, s'gieng auä eh id Hose. Isch sicher e guete Idee. Mau luege. U s'Wätter macht sowieso geng das wo's säuber wott u die vur Politik o oder so.