Zwüsche zwöi und drü - i däre Nacht
Hellwach
Es isch so still, eifach nume still
Ab und zue glich es Outo uf der Strass
Chunnts vu rächts oder chunnts vu linggs
Eigentlech egal und dennnoch, i frage glich
Gö sie ächt hei
Oder sueche sie nach öppis oder öpperem i däre Nacht
Es isch so still
Keis Lache uf der Gass
Niemer wo strittet, zangget, chüschelet oder verläge lächlet
Niene s Stöhne vumne Liebespaar
Zwüsche zwöi und drü
Es isch so still
I ghöre mine eiget Schnuuf u wett er chiem vu dir
Es paar lisligi Rägetropfe duss
E chüehle Luft vum halb offene Fänschter chunnt
Chüehl irgendwie u i wett i chönnt jez dini Wärmi gspühre
Zwüsche zwöi und drü
Si Sehnsücht und Wünsch di gliche oder ämu ganz nach dra
Wie die zwüsche Apero, Znacht und Mitternacht
Oder die am Morge früeh
Oder die vum ganze Tag
Oder die us de Tröim, wo eifach jez grad nid wei cho
i däm Momänt zwüsche zwöi und drü
wo sich irgendwo im irgendwo verstecke u verdrücke
Es isch so still dass i mini Gedanke cha ghöre dänke
Wie sie umeschliche, chöme u ume grad wieder gö und sich is iweissnidwo verzieh
I däre Nacht zwüsche zwöi und drü
Wo so mängs so viel schöner wär
Wenn‘s eifach e chli andersch wär
Zwüsche zwöi und drü, oder dervor
S‘Nachhär isch de wieder e ganz andri Gschicht
Hellwach, irgend ire andre Nacht, zwüsche zwöi und zwüsche drü
So still
