Erschtunlech - Gedanke - Gedicht

 

Es isch doch geng ume erstunlech

Was aues passiert wenn nüt passiert

Es isch doch geng ume erschtunlech

Was aues passiert wed meinsch dass nüt passiert

Es isch doch geng ume erschunlech

Was nid passiert wenn viel passiert

Nid das wo passiert isch erfreulech oder beunruhigt üs

Erscht s‘iordne (i üses Dänke und Füehle) macht üs de Freud oder Angscht

Wüe s‘Ereignis an und für sich nur es wärtfreis Ereignis isch

Und genau so isch wie‘s isch

I weiss, dass dis Iordne nie s‘Gliche wie mis cha si

Drum probieri dört wo‘s geit, dis la dis und mis la mis si

Egal ob viel oder wenig passiert

Wenn öppis z‘Änd geit - Gedicht - Gedanke

 Wenn öppis z‘Änd geit

Denn dänkt me oft a Afang zrügg

Seit är zu ihre i däm Film

Grad e so oder halt de ämu ähnlech

Wenn öppis afaht denn dänkt chuum öpper scho as Änd

Da derzue bruuchts kei Film wo eim das nächer bringt

U Zyt derzwüsche isch genau die Zyt

Wo ihm und ihre i däm Läbe oder däre Liebi blibt

Für z‘hoffe dass alles andersch sötti ände

Als so wie i däm Film und sich zum Guete wände

Wenn sich d‘Frag nach Afang und Ändi schtellt

Und är zwinnkeret und e andri Satz as Ändi schtellt

Mr.&Mrs.Smith

Nid aui -Gedicht

i mire Nachbarschaft tüe aui nächberle

I mim Theater tüe aui wo chöi chli chäschperle

... aber ...

Wüeu nid aui wei was aui wei

Gaffe lieber Fernseh bi sich dehei

(Oder schrisse süsch e suure Schtei)

U meine si tüese das wo aui chöi

Eifach nid gliich, chli andersch bi sich dehei

Wüe eifach nid aui wei was aui wei

Irgendwo oder ou bi sich dehei

Und ou so geits teune Nid-Masketräger

Wüe si meine, nid z müesse was die meischte andre chöi

Isch das nid e Schuss is eigne Chnöi

Der Unterschied ... Froue u Manne ... Gedanke

Der Rüedu het - grad i däre Corona Zyt - mau chli der Wil gha, sich mit de Profilföteli vu Froue u vu Manne i de soziale Medie oder uf de Partner-, Sex- oder Hüratsportal usenander z‘setze.

U was isch da ufgfalle ?

Froue präsentiere sich hüüfiger als Manne:

- mir ihrne Änkle (isch natürlech e Frag vum Alter) und ou ... darf me das ?

- mit ere Fründin oder gar zwöine ... darf me das (errat weli bi ni ?)

- mit emne Ross

- mit emne Hund oder der Chatz

- ir Natur im Wanderkostüm

- mit me Kaffee ire Beiz

Manne präsentiere sich hüüfiger als Froue:

-  mit em Töff

- mit oder vorme sportleche Outo

- imne Liibli vumne Schuttclub

- mit der Gitarre oder em Bass

- ufme Mountain Bike oder Rennvelo

- mit me Glas Wi / ... oder Bier

- mit Zigarre

- aber fasch nie mit Änkelchind (chiem auä schlächt a) oder Fründe (ou das, aber wurum eigentlech?)

Und wurum der Rüedu das als Maa alles weiss ? Gheimnis ! (Stichwort „Hacker“)

U was machsch jez mit däne Erkenntnis ? Nid viel ... oder ... Machs eifach andersch, we Du di wosch abhäbe vur Masse. Oder machs ou genau e so, we dir wohl isch derbi. Söu ou nid nume schlächt si. U scho mängi und mänge hei jez e neui Liebi ... s‘söu ou möglech si.

I bi wie ni bi - Gedicht - Songtegscht

 Zwüsche Blödsinn und Wahnsinn

Zwüsche Spass und zwüsche Ärnscht

Zwüsche lieb, brav, adrett und bös oder fies

Bi ni mängisch e so und mängisch chli andersch

Aber immer, das schwöreni dir, bi ni so wie ni bi

Und das, das lah ni mir nid la näh, süsch giengs mir mies

Wüe i eis im mim Auter u mit mine Erfahrige hützutag weiss

I mues nüm jedem und jedere gfaue, ganz ohne Scheiss

Iichoufslischte vum Läbe - Gedanke

                                     

Hey ... wie geits dir so im Bruef

Hey ... hesch jez eigentlech es Huus kouft

Hey ... hesch jez eigentlech e Frou

Hey ... bisch zfride mit dim neue Outo

Hey ... wo häre geisch i de nächschte Ferie

Alles Frage zur Iichoufslischte vu mim Läbe

Und wurum fragt niemer: bisch glücklech ?