Vergiss nid z‘läbe – Gedicht und Gedanke

Vergiss nid z‘läbe und vergiss s‘Läbe nid

Är isch da, laht üs grad nümme eifach so la gah

dä Virus hocket überau, ir Zytig, am Radio, Fernseh Herrgott no mau

Är nimmt üs d‘Sinne, s‘paar vö scho afa schpinne

U mänge fragt wär chönnt i däm Schpiele da am Schluss de gwinne

Är isch da, laht üs nümm los und eifach so la gah

Dä Virus hocket überau, im Zug, im Bus oder ou im Fitti

Mir wäsche d‘Händ bau ununterbroche im liege, sitze und im schtah

Tag und Nacht, am Wuchenänd und vum Mäntig bis am Friti

U trotz auem oder grad ou wäge däm

empfili Dir – vergiss nid z‘läbe und fröhlech si wie gäng

Lue gschider mau was no aues geit

und mein nid s‘ig aues jetzt grad abverheit

Gniess aues wo‘s jetz grad z‘gniesse git

Weisch ... wahrschinlech ischs ja no nid so wit

U mängisch ... und das chönnt schtimme und ou wahr si

Ischs besser mau nid aues z‘läse und z‘gloube, da blib i derbi

*. *. *. *. *. *. *

U dänk dra

Aui ... würklech aui Mönsche gloube immer genau das, wo sie dra wei gloube
Aui ... würklech aui Mösche lose immer nur genau us das wo sie wei lose
......
nume das u aues andre schliesse si us ... meischtens

u der Räschte isch Verschwörig, Fake, Unwahrheit, Bschiss oder e grossi Lugi

säge si ... uf beidne Site ... uf aune Site, links wie rächts
Wües ne nid passt, nid i ihres Wäutbieud passt

 Und wüe si immer wei Rächt ha, d‘Mönsche

und wüe si immer aues wei verschtah

ou we d‘Experte säuber chli am Hag tüe schtah

S‘isch auä ou chli d‘Angscht vorem Kontrollverluscht 

und d‘Angscht vorem Schtärbe ganz generell

UND ... s‘einzige wo ni würklech weiss isch ...

... dass ig weiss das i eigentlech fasch gar nüt weiss !

Und ... dass würklech fasch aui Mösche überforderet si,
uf die einti oder anderi Site, egal ob sis ärnscht näme, zfescht ärnscht
Oder sich ir Hieuflosigkeit nume no wei luschtig mache (ohni z‘si)
und am Ändi Anzahl Toti mit Tote vergliche, zum öppis z‘relativiere
wo chuum geignet isch derzue.

Drum ... vergiss nid z‘läbe
 und vergiss s‘Läbe nid
Jetz ! Jetz erscht rächt !

U das wo üsi Bundesbehörde u die vu de Kantön und d’Medizinfachlüt etc. da leischte

Das find i guet und richtig und i bi froh und dankbar dass das so isch

(Gsehsch – I gloube ou das wo ni wott)

Isch auä nid eifach serig unpopuläri Massnahme z‘erlah

Das wünscht sich bi Gott wou niemer

++++++++++++++++++++++++++++++++++++++++++++

D‘Iiladig (i Corona Zyte) - Gedicht

https://huet-ha-ni.blogspot.com/2021/04/diiladig-churzgschicht.html

Lischte mit allne Gedicht