Hous ab, verreis, verzieh Di ! Ha ni ganz liislig gseit, wo ni hüt uf em Houmträner bi gsässe, wohlig warm gschwitzt ha, mi Körper gschpührt ha u der Schnuuf wieder mau zeigt het was Schnuuf heisst und bedütet. Grad ou i däne Täg.
Hous ab ha ni gseit und derbi dä Virus gmeint. Dä wo üs aune so e riesegrossi Angscht macht, dä wo üs verunsichertet und dä wo üses Läbe völlig neu büschelet. E so völlig neu büschelet wie sich das niemer, aber ou gar niemer het chönne vorschtelle, gschwige denn no erahne oder gar sich wünsche.
Mir wo alli so ahnigslos üse Alltäg Tag für Tag vor üs häre gläbt hei.
U plötzlech frag i mi, schnuufend u schwitzend uf däm Hoimträner, ob da nid e fiini – oder ischs am änd eher e luuti vorwitzige oder gar e triumpfierendi Schtimm – seit: Hous ab ... verzieh Di ...
... verzieh Di!?2. Isch das öppe gar dä Virus, wo da zu mir und zu Dir redt ? Wo seit: zieh Di zrügg und verchrüüch Di zu Dine Änscht, i dis Näscht, i Dini Erinnerige, zu Dine Wünsch und Sehnsücht u zu däne Lüt, wo dir am nechschte si. Ganz richtig und real oder i all dini liebevolle Gedanke.
Wo villicht ou meint, dass ou der siebzäht schräg Klopapier– oder Hamschter–Witz uusglachet, abgsugget und nümm würklech zum Lache isch und di nume ablänkt vu däm wo wird, wenn Facebook, Twitter und WhatsApp mau zwöi drü Minute andri Gedanke zuelöh, wenn du derzue bereit bisch. Wenn du merksch, dass ou all di plötzlech so zahlrich vorhandene gschide sälbschternannte Besserwüsser und VirusExperte mit ihrne toupatschige dernäbne Youtube Videos nur Schtuss verbreite. U dä chunnt a, bi einige, wüe ou si eigentlech nume Anscht hei und sich nach eifache banale Antworte sehne und i däre Angscht ganz unverhole unprüeft däne Zouberdökter uf e Liim göh. E Liim wo nid lang wird häbe wüe vienu früeher oder schpeter d Ouge tüe ufga. Si sötte vieu meh uf das lose wo der Virus seit. Hous ab und hieh und hieh di zrügg ... zu Dir säuber. Aber villicht het haut der Rüedu i sim Adrenalin–Ruusch ou nid richtig häre glost u im gröbere Iifer e chli afa fäu interpretiere. Du weisch säuber was richtig isch – für Di – und was guet tuet. Aber dänk dra. Mach nur das u würklexh nur das wo aune Mönsche i dire Umgäbig guet tuet. Und los ... wenigschtens einisch .... uf das wo der Bundesrat seit. Aber nimm no eine vum Rüedu entgäge. Beweg Di ... körperlech aber ou geschtig. Bliib nid hange i däm unsichere Bange.
U lies doch wieder mau es guets Buech ... am Rüedu sini Empfählig ... hervorragend gschribe ... eifach nume guet ... und es Vergnüege zum läse. Schprachlech und ou inhaltlich !
————————————————————————
Alli Corona–Gedanke vum Rüedu
—————————————————————————
ES ABSOLUT WICHTIGS UND GUETS VIDEO !
WIRD EMPFOHLE ZUM LUEGE
Blib deheim du Pfyffe
————————————————————————————
Empfählig:
Usgsuechti Artikel us der Press zum Thema Corona und drum herum
