Hesch di scho mau gachtet ... es het würklech (fasch) keini Kondänsstreife geh am blaue Himu. So wies hütt zu tags ou fang schwierig isch, Kondänsmieuch i de Läde z‘übercho. Und wurum das ? Nid öppe wüe wägem Virus fasch keiner Mönsche me flüge und nid öppe wüe ganz vieu Länder ihri Gränze gschlosse hei. Nei ... wüeu jez die Mächtige vu däre Wäut ihri ganze Gift uf die wehrlose Milliarde vu Mönsche via Flugzüg (Schtichwort Chemtrails (*)) fertig abeglah hei. S‘Wärch isch vollbracht u es paar tuusig Idiote uf däre Wäut gloube dä Seich.
Aber i de soziale Medie tummle und fummle nid nume Mönsche a däm Hirngeschpinscht ume. Da wird ou (und tragischerwiis) ärnschthaft behouptet, dass d‘Elite vu däre Wäut (auso wahrschiinlech aui Regierigschefs, aui Parteibosse u aui Wirtschaftshäuptlinge) zäme u im auergheimschte e Pakt gschlosse hei, wie me i Zuekunft d‘Mönschheit cha kontrolliere, manipuliere, chneble und so irgendwie als gfüegigi Sklave oder Huustier halte.
Und es paar ganz gschidi luege de Videos im Youtube und tüe di mit unheimlichem Fliss verteile. Eile mit Langweile.
Hey Lüt, heit dir no nie dra dänkt, dass eues Misstroue gägeüber Schtaat, der Press, de Experte, de Ärzt, de Virologe eifach nume chli überhäblech ohni Aaspruch uf Überhäblechkeit isch. Oder isch es öppe eifach Angscht, ohni zue z‘gäh dass du eifach e riesegrossi Angscht hesch.
Grad vori bhouptet so ne Gschide, er heigi ghöhrt, dass zwüsche em 1. April und 15. April s‘Internet abgschtellt wärdi u scho jez aues zensuriert wärdi und Posts vu de Weise sofort glöscht wärdi. Klar ... das würd i ou, wenn i der Scheff vum Internet wär.
Da cha ni nume eis säge. Grad geschter – wo ni im Garte gsässe bi – si es paar Sänf– und Majo–Tube über mi gfloge. Das isch wahr ... ohni Kohl. U eini vu däne het grad uf de Gartetisch gschisse. U dert drin isch es chlises Zetteli gsi und uf däm isch gschtande, dass aui Mäudige vu flügende Sänftube nume Mischt u Verschwörig sige. Has is Facebook ta ... isch immer no da ... der Herr Facebook het mir sogar hösxhtpersönlexh gschribe i chönn no jede Mischt schribe ... bis zum erschte April, und denn luege mir wär denn no was gloube will.
(*) https://de.m.wikipedia.org/wiki/Chemtrail
Alli Corona–Gedanke vum Rüedu
Empfählig:
Usgsuechti Artikel us der Press zum Thema Corona und drum herum
