Sie spriesse gägewärtig. So wie Spargle zur Sparglezyt, so wie d‘Chnoschpe überau vieu z‘früeh wüe die globali Wärmi uf däre Wäut em Virus trotzt und immer no vieu z‘warm für üsi Zuekunft isch u blibt. Aber lö mir das. Ämu jeztz.
Churz, um ufs eigentleche Thema z‘rügg z‘cho: Sie schpriesse u wei sich verteile, die Video Botschafte vu säutsame Dökterlis, wo sich amasse, meh z‘wüsse über dä Virus als all die tuusige vu bescht schtudierte Expärte, wo wäutwit aune Regierige zur Verfüegig schtöh.
Aber no schtrüber si die, wo serigs tüe teile i de soziale Medie oder per SMS oder so. Serig wo vor Panik warne u derbi säuber uf Panik mache. Unbedingt teile, wichtig, ändlech Wahrheit ... bla bla bla). Serig wo meine, ou si ghöre wie die säutsame Dökterlis zu de Userwäuhte, wo wüsse was Sach isch u wo merke, dass die nünenünzg komma nün Prozänt vu de angere Unwüssende eifach Voutrottle si und „die Hischterie“ vu de Medie, der Tagesschou und Regiernde u Behörde u betroffene Schpitauärzt tüese gloube.
So eifach isch es. Eis oder zwöi Füf–Minute–Videos uf Youtbe lose u voyla scho ghörsch zur Elite u zu de Erhabene u Erlöste wo nümm müesse läse, sich informiere oder mau chli überlege u dänke. Schwupps da weisch es u ghörsch derzue, zu däre Chlinschtgruppe vu Userwählte, hätt bau gseit gschtöhrte.
Haut ... öppis muesch scho.
Nei ... nid ufpasse, Händ wäsche oder gar deheime blibe. Teile muesch das Zügs, so wie das bi angerem sektirerischem Rudelverhaute gang und gäb isch. U no öppis bruuchts: Durchhaltewille! Nei nid öppe zum deheime blibe. Nei ... zum sture Feschthaute a däne Verharmlosigs Schwindel Gsxhixhtli. Me isch ja schliesslech scho chli z‘schtouz ... aber uf was de ? Lose, überlege, dänke, handle, so wie üs das üsi zueverlässige u beschtes handelnde Behörde empfähle.
Verantwortig übernäh und nume seriöse Nachrichte u kei serige Mischt witergäh !
Verantwortig übernäh und nume seriöse Nachrichte u kei serige Mischt witergäh !
Alli Corona–Gedanke vum Rüedu
Empfählig:
Usgsuechti Artikel us der Press zum Thema Corona und drum herum
