U es isch ruehiger worde zum Thema Hamschterchöif und WC–Papier. D‘Witze göh de ganz Humorvolle und Repetierer langsam uus. Die würklech witzige und ou die nume plumpe, fasch gar chli blöde. S‘Uslache vu däne Lüt, wo mau chli meh kouft hei aus süsch ume het gruehiget.
U s‘chönnt ja ou si, dass aui die vur Sorte Überhäblech (läck bi ni vieu besser aus au die Trottle wo me i de Läde gseht) nume darum hei chönne Föteli vu offebar lääre Regal umeschicke, wüeu si ka säuber i däne Lade hätte wöue ga lädele u poschte.
Weisch, i gloube, dass die Dütsche (zum Biischpieu aber ou fasch aui angere um üs ume) eifach so ehrlich si, dass sie i Audi, BMW, Merz der VW hocke, i nächscht Aldi oder Lidl fahre u das iichoufe, wo sie meine, sig grad nötig für ne Wuche oder zwöi z‘überläbe oder 4 Wuche lang jede Tag s‘paar mau z‘Füdle z‘putze.
D‘Schwizer hingäge gö ou i ihres Öuetli, fahre aber mindeschtens vier bis füf Dörfer witer wäg u schliiche de dert möglechscht unuffällig i ne Lade. Für dass sie de, oh Schreck, merke, dass ziemlech vieu Mönsche us ihrem Quartier vermuetlech die gliichi Idee gha hei. U so heissts de haut, grüessech Frau Muschter oder tschou Sepp oder Kari. „Sooo ... ou da ? Wiesch mir hei grad e chliine Usflug gmacht u de dänkt, mir chönnte ja no öppis chlises ga iichoufe.“ ... bi platsch vouem Iichoufswägeli.
U so chas öppe vorcho, dass die, wo sich so schuderhaft luschtig mache über e Teil vu ihrne Mitmönsche säuber de grad gar nid amne andre Ort schtöh, wes drum geit, s‘Überläbe vur Familie i de nächschte Täg u Wuche imne schtrube Umfäud z‘sichere.
U jede vu däne Ertappte zeut de uf Verschtändnis u Solidarität vum Vis–a–vis, dass de öppe nid plötzlech es verfänglechs Föteli im Facebook und Co. drinne schteit. Me het ja schlussändlech teils die gliiche „Fründe“. Aber lue mau a, da isch ja scho wieder eine us em Quartier. Zuefäu gits, ou i däne herte Zyte.
U weisch, im Quartier wo Du wohnsch, chasch jez ziemlich vieu Lüt us de Quartier u Dörfer näbe dra lehre kenne. Ou no ganz interessant.
Ou we Du jez vermehrt deheime sxhtatt ir Schtadt
oder de Läde bisch ...
... wär seit de da, dass es dehei söu längwilig si ?
U jez isch är ändlech iitroffe
der Iichoufswage für de ehrlech Hamschter ... Hamschterer !
I säge aber nid wo ...
———————————————
Alli Corona–Gedanke vum Rüedu
Empfählig:
Usgsuechti Artikel us der Press zum Thema Corona und drum herum
