Samstag, 29. Dezember 2018

Hüt ha ni mir vorgschteut

Hüt ha ni mir vorgschteut, wi vieu Mönsche de ume wider dür d Schtadt düre pfüdere u ganz ufgregt si, wües i jedem Lade aues vieu (!) billiger aus no vor de Wiehnachte git. Da gits Parfümerie wo dir genau s'gliiche Parfüm mit füfzg oder no me Prozänt Rabatt tüe verschärbele aus zu däm Priis wo du vor däre Wiehnachte für dies Schatz Gschänk häregleit hesch. S isch doch eifach nume verruckt. Es gibt geng u fasch jede Tag Usverschouf oder haut Seil (Sale) wie mir uf neu Bärndütsch tüe säge. Voupriis zahle nume no Vouspöschte. Gäu !

Freitag, 28. Dezember 2018

Hüt ha ni mau öppis angers - d'Bärndütsch Expertin wird vorgscheut

Hie gits es Interview mit der Bärndütsch Expertin und irne Büecher fü aui wo dranne Ineresse hei: 

Hüt ha ni s'Glück gha u bi im Chino am Housi begägnet

Hüt ha ni s'Glück gha u dörfe itouche id Wält vure Bärner Musiker Grössi vur bsundere Art. Dr Doku Film über e Housi Wittlin het mi entfüehrt is Riich vu lässiger Musig irgendwo zwüsche Volksmusig u feinschtem Rock'n'Roll, gschpickt mit witzige u gschide Unterhaltige u Dialoge mit däm interessante Mönsch Housi u sinere Gedankewält. I has gnosse die Fiinheite vu de Tegschte z entdecke u gar mängisch isch mir es Lächle übers Gsicht ghuscht u no viel meh ha ni ou eifach härzhaft chönne lache u schmunzle. E Chino Abe ir Cine Matte wo ni nid grad sofort ine Schublade tue verrume, sondern wo no chli darf bimer blibe u nache ruusche. I ha's gnosse, Housi. Merci. U irgendwie isch mir no der ganz räschtlech Abe der Rock'n'Roll vu Bärn im Ohr hinge nache umeturnet u het freudig gliedet.

Mittwoch, 26. Dezember 2018

Hüt ha ni mis Poschtfach ufgruumt

Hüt ha ni mis iMäil Poschtfach ufgruumt. I wott mit Ornig is neue Jahr ga. Suber u ufgruumet söus si. U da ha nii däre Riesemängi vu Niusletters vu Konzärt u Oupenär Veranschtautige chönne umenuusche u gluschte. U wenn i au das wett gshe u ghöre u gniesse, so hätt i im neue Jahr überhaoupt kei Zyt me, meh aus zwöi Wuche id Ferie z'gah. Nach einigem Hin und Här Ueberlege ha ni mi de entschlosse. I GA id Ferie, trotzdäm oder grad wäre däm. Zum mi vu däm Unterhautigs Birchermüesli chönne z'erhole. Wandere u eifach Schtiui, Rueh, früschi Luft, Sunneschiin u nur der eiget Pues wo pöpperlet.

Montag, 24. Dezember 2018

Hüt ha ni iikouft u gschleppt u müesse dänke

Hüt ha ni iikouft für der hütig Heiligi Abe und ou für morn und übermorn - däne shopping-freie Täg. Hüt ha ni drüü mau wöue schleppe - ja weisch z'Fuess u chli gmüetlech. U hüt ha ni drüü mau ar Kasse zaut, wüe ig's eifach vieu vieu besser finde - ar Kasse zahle. Weisch für d'Arbeitsplätz generell u wües eifach schöner isch amne Mönsch chönne id Ouge luege und nid are Maschine. Säubschtscänning heisst die uverschämt leidi ja übli Mode. Die Mode, wo dr Konsumänt der Tschob vum Lade macht, weisch das vou gratis u freiwillig - auso günschtiger wird das aj nid, ussert är vergisst de hin und wieder säuber öppis (tüürs) iiscänne. Söu ja ou si Riz ha. Me gloubts gar nid. E chli dumm, oder ? D'Grossverteiler säge dass Konsumänte das wöue. Aber si tüe dir's ou nid eifach mache - mängisch - überhoupt no e bedienti Kasse z'finde. Ja mängsich ha ni s'Gfüeh, dass mir Mönsche (ir Schwiiz) vou dranne si, auses derfür z'tue, üs säuber abschaffe. Git mir seehr z'dänke, we ni dänke, wie weni teuwiis dänke.
U da bi ni eifach nume e chli froh u faschgar e chli glücklech gsi, dass es no Mönsche git, wo serigie Tschöb dörfe usüebe, wüw mir aui ja möchte, dass es so blibt. Oder tüscheni mi ?

Sonntag, 23. Dezember 2018

Hüt ha ni drü mau läär gschlückt

Hüt ha ni drü mau läär gschlückt wie me so seit. Drüü mau läär denn wo nis Fernsehprogramm gschtudiert ha. Haubi Jahrzähnt chöme immer die gliiche Wiehnachtsfieme. U eine blibt haut mi ganz persönlech Liebling "Weihnachten bei Hoppenstedts". Dä isch u blibt eifach Hammer Hammer guet, so wie fasch aues vum Loriot, däm grosse Meischter vu Humor, Schalk u Satire u viel meh. Auso de, lööt üs wieder amu es chlises Atomchraftwärch baschtle mit de Hoppenstedts.

Samstag, 22. Dezember 2018

Hüt ha ni dänkt d'Wäut göng unger so churz vor Wienachte

Hüt ha ni dänkt d'Wäut göng unger, so stober u ghüslet u verzatteret u verdatteret hei d'Lüt ta ir Schadt, zwöi Täg nume vor Wiehnachte. Hei gmüpft u gschtungget wie am Zibelemärit oder vor em Igang is Schtad dö Suisse vormne Mätsch oder Konzärt. U i de Läde hei si i de Chörb u Gschteu umegfingeret u ghändlet, wie we si ume letscht Härdöpfu müesste striite. U s'het eim grad ou e chli tüecht, aus ob so ne Närvösi über d'Wäut cho wär. I gloube geng churz vor däm Fescht vur Geburt vum Heiland wärde vieu Lüt schtober u ulidig. s sig die heiligi Zyt meine vieu. U vieu chö offebar s'schöne a däre Zyt chuum me gniesse. Denn, wenn aues chli schtiuer wird u Zyt da wär, chli i Di ine z'lose. U villicht chli vu däm Wunder es Schnitzli oder Schlückli nä - für Di alleini.

Hüt ha ni a geschter dänkt und es si mir Wehgueteli i Sinn cho

Hüt ha ni hurtig hurtig a geschter dänkt u da dra, dass in ganz Bärn der Räge so ta het, wie wenn är würd s'alte Jahr wäg schpüehle oder ämu das, was drann nid guet gsi isch. U da gäbs ja einiges. Drum muess es halt ou hüt noc rägne u wahrschinlech ou no morn und mänge Tag. U gliich hei mir doch alli Sehnsucht nach chli schön und schöne Sache. U schön isch ou gsi, dass gan viel jungi Lüt u SchüelerInne si ga demonschtriere. Für nes bessers Klima oder derfür, dass mir alli zäme ändlech aues, aber ou würklech aues dra setze, dass es nid so schlimm wird mi viel gschidi Lüt üs tüe wis mache. Isch nid ganz eifach z'merke, das ou Du und ig dran tschued si, was für ne Misere uf die zuekünftige Generatione zue chunnt. s'einzige wo mir chöi mache isch handle. Jetzt und gruusig konsequänt, so dass es üs weh tuet. Weh tue cha ou guet tue. WehGuetli seit me dämm !

Mittwoch, 19. Dezember 2018

Hüt ha ni gmerkt wie verruckt dä Tag worde isch u d'Aare soo grüen

Hüt ha ni gmerkt, dass der achtzäht Dezämber scho e verruckte Tag isch. Auso gsi isch. Z'erscht hets so richtig verdeckt ta, ds Wätter und gniselet hets ou am Namittag. U die meischte Lüt hei volli Büch gha vum x-te Wiehnachtsässe und d'Nasene si teilwiis scho fasch e chli rötlech gsi vu däm feine aber vor allem vu däm viele Glüehwii. U wies nid scho gnue glüeht hätti bi vielne, hei sich s'paar gar ugattelig müesse ufrege, wüll die grüene Liberale, also die Junge vu de grüene Liberale (JottGeÄlPe) , grüens Pulver oder so id Aare gschosse hei und die Aare nächhär ganz giftig derhär cho isch. U - i has sälber mit eigete Ouge gseh (gschwore) - s'isch no viel schlimmer gsi als i däm Lied vum Anaconda u sine Jogger und de Hünd. Ehrelch, das schtimmt.
S'git Lüt, die überbisse sich scho, wenn's nume chli grüen tönt. De vö die afa Züg behoupte vu Sache wo si gläse heige im Internet u we de nachefragsch im "Gsichtsbuech" (*) de chöme de plötzlech ganz anderi Argumänt. Aber ou chli wirr. Klar isch es schwierig z'unterscheide zwüsche au däne verschiedene Grüene, we me säuber kene isch. Aber umgekehrt isch es ou nid ganz eifach, zwüsche däne u de andere Rächte der Unterschied z'mache. Und de no all die Chemikalie u de no we si so farbig si. Das schnallt chuum eine alleini, ob gschdudiert hesch oder nid. Aber zrügg zur eigentleche Tat. Die Lusbuebe u Lusmeitli hei schiints öppis dermit wölle bezwäcke. Si hei wölle säge, dass es auä de gar nid gmüetlech oder gar luschtig  isch, ir Gägend vu Kanderschtäg, uf all däne Granate u Bombe u was der Cheibs o immer müesse umezhocke. Es weiss nämlech niemer, wie die scharfe Dinger da söue weniger scharf wärde. Aber vu au däne doch sehr ärnschte Alige het (ämu fasch) niemer gret. Aui die wo eigentlech nid grüen si hei plötzlech afa grüner tue aus jede Grüentee mit oder ohni Zucker. Auso i ha gmerkt, und jetzt chumi wieder ufe Afang zrügg. Es isch e verruckte Tag gsi. S ganze Internet het nume so gwimmlet vu Brichterschtattige u Meinige u fasch aui hei gmeint, SIE heige rächt. U das het e Sach usglöst wiit über d'Gränze vu Bärn. Aber - wie scho gseit u i blibe derbi - über s'eigentlech berächtigte Alige het fasch niemer wölle rede. Mou, öpper het gmeint, i de meischte Schwizer See sige no tuusigi vu Bombe u Granate versänkt. Wie we das däne in Kanderschtäg öppis würd hälfe. U morn - da bi ni sicher - überbisse sich viel Lüt wieder amne ganz andere Thema. Villicht stimmt d'Farb vum Findbild - auä scho ? Oder ? Oder de sis de haut die Rote. Ämu mau Proscht. Und apropos roti Farb. S'git schiints ou wisse Glüehwii. Isch chli neutraler.

(*) vum Gsichtsbuech (nid Gschichtsbuech) gits ou e änglische Variante im Inter-nett



Dienstag, 18. Dezember 2018

Hüt ha ni gmerkt, dass d' Wienachte chunnt

Hüt ha ni ume mau so richtig gmerkt, dass d'Wienacht vor der Türe schteit. Im Internet ha nis gmerkt.  Da schribe mir so viel Schops und Schöppli, wo ni je mau einisch öppis pöschtelet ha, dass grad hüt und nume no hüt d'Rabatte einmalig teuf sölle si und das ig nume no sächs Schtündli Zit ha, irgend öppis Gschänkligs z'bschtelle. U sünsch sig i ä Löu. Guet, das hei si so nid gseit aber dänkt auä de scho, da bi ni sicher. U de ha ni mi entschlosse, dass ig nid nume die Rabatte wott schpare, sondern no vieu meh. U so ha ni de mindeschtens sächs Schtund nümme i das Internet ine gluet. Isch nid eifach gsi aber i ha mi düre bisse. Und eis weiss i jez aber ganz sicher. D'Wienacht chunnt ou so.



Hüt hani - über mi - Kontakt - iMeil - u süsch no so / Bärndütschi Churzgschichtli - Berndeutsche Kurzgeschichten

Hüt ha ni - Hüt hani - Bärndütschi Geschichtli us em Alltag - es prichtet dr. Rüedu

Hüt ha ni ... Bärndütschi Gschichtli us em Alltag vu mir, vu Bärn, der Schwiz u der ganze Wäut - Tabu-freii Gedanke, Ploudereie u Säubschtgespräch

Heute habe ich .... Geschichten aus dem Berner Alltag / Erlebtes und Erdachtes eines Berners

Berndeutsche Kurzgeschichten - Schweizer Mundart Kurzgeschichten

I bi dr.Ruedi oder besser haut dr.Rüedu, wi mir einige säge u de ha ni no süsch s'paar Näme. Aber lö mir das u lös gschider bi eim. Äbe ... dr. Rüedu (dR).

Und eh ja ... aui Gschichtli si zu ca. 99,9 Prozänt erfunde, erstunke und erloge u sötte si e ganz e chlini Ähnlechkeit zu öppis richtigem ha - ja das nennt me de haut eifach Zuefau.

iiMeil: Wett Du mir wosch schribe de tue doch    derruedu@gmx.ch

Aber i bi chli e fule Hung u tue nid all Tag läse ... häb eifach Gedued - gäu. e Antwot chunnt de scho mau. Merci.

U we de wosch chasch mi cho bsueche - uf am Twitter


------------------------------------------------------------------


https://berndiesunddasblog.wordpress.com 
https://bern-diesunddas.blogspot.com
http://m3wg.blogspot.com






Wosch ?

==========================================================================
Wosch regumässig informiert bliibe ? De chach Di obe rächts um däm Blog bim Niusletter iitrage.
==========================================================================

Beliebti Gschichte sit geng uf däm Blog

Stichwörtli

2019 (1) 4G (1) 5G (1) Abe (1) abschaffe (1) abschteue (1) Abschtimmig (1) Abstimmig (1) abtrosche (1) abwarte (1) Agända (1) Alarm (1) Alegi (1) Angscht (1) Apotheke (1) Äpp (1) Ässe (3) Atomchraftwärch (1) aut u jung (1) Auter (1) Bahnhof (2) Ballascht (1) Bänds (1) Bärn (6) Bärndütsch (1) Bärner Musig (1) Bärner Szene (1) Berner Fasnacht (1) Beschtatter (1) besser gsi (1) Bett (1) bigdata (1) BIO (1) Blindehund (1) Bluet (1) Bombe (1) Bös (1) Böss (1) Brätle (1) Brexit (1) Briefchaschte (1) bsundere Tag (1) Bügu (1) Bundesrätin (1) Buuch (1) China (1) Chinese (3) Chino-Abe (1) Chläber (1) Chleider (1) Chole (2) Chönig (1) Chopfhörer (1) Chrankekasse (1) chueflade (1) Chueplütter (1) Chüeschrank (1) Compi-Musig (1) dänke (2) Decher Schnee (1) deklariere (1) Dialäkt (1) Diiler (1) diräkt (1) drüü macu läär schlücke (1) Dürenang (1) E-T (1) Eier (1) eifach so (1) eMail (2) Erbarme (1) Es-paar-Minute-Zytig (2) EU (1) Expertin (1) Familie (1) Fasnacht (1) Ferie (2) Fitnes (2) Fitness (1) Fleisch (1) Fleischlos (1) Follouer (1) Folouer (1) Föteli (2) Freudeli (1) Fridhof (1) fröhlech (1) Froue (1) Frücht (1) Früecher (2) früecher u hütt (1) Füess (1) Fürzle (1) GA (1) Gas (1) Gäud (1) Gedanke (1) Gedicht (2) Generatione (1) Gift (1) Gitarre (4) Glace (1) Glette (1) Glück (1) glücklech si (1) Glüewii (1) Gmües (2) Gniesse (1) Granate (1) Gratis-Zytig (2) grediuse (1) Grilliere (1) Grillitarier (1) grinse (1) Grossverteiler (1) Grüch (1) Grüeni Aare (1) Grüenliberali (1) Gsang (1) Gschänkli (1) gschribe (1) Gschtank (1) gseit (1) Gsichter (1) Gsichtsbuech (1) Gsundheit (1) Gsundheits-Wotsch (1) Gsundheitsdate (1) gwinne (1) Haarschnitt (1) Händ (1) Handle (1) Handy (1) Händy (2) Handys (1) Harmonie (1) Härz (1) Härzchlopfe (2) Härzflattere (1) Heips (1) Hose (1) hudle (1) Huduwätter (1) Humor (1) Husarzt (1) hüt (1) iichoufe (2) iimeil (1) iMail (2) iMäil (1) Influäncer (2) Influänser (1) Initiative (1) Inschta (3) Internet (4) iscänne (1) Ivents (1) Jäger (1) Jaggene (1) Jugend (2) Junged (1) Jungi Grüenliberali (1) Jungi Lüt (1) Kaffe (3) Kaffee (1) Kafi (1) Kanderschtäg (1) Kassebon (1) Kataschtrofe (1) kei Vorsätz (1) Klima (1) Klimakataschtrophe (1) Klimaschreik (1) Klimaschtreik (1) Klimawandu (2) Konservativi (1) Konsumwürmli (1) Kontakt (1) Konzärt (1) Kuhpon (1) Kultur (1) Kunscht (1) Läbe (1) lächle (2) lädele (1) Längwili (1) Läsetipp (1) Leiks (1) Leuthard (1) Lieder (1) Maa (1) Mänätschment (1) Manor (1) Mäntu (1) Marketing (1) Minute (1) Mischt (1) Mischthuufe (1) Mitleid (1) Möbu (1) Mödeli (1) Mönsche (1) Morge (1) Muet (1) Musig (7) Musiker (1) nächschti Generation (1) Närvösi (1) Neujahr (1) Niusletter (1) nümme geit (1) Ohrhörer (1) Ornig (1) Oupenär (1) Panik (1) Parteie (1) Peschizide (1) Plombe (1) Poet (1) Politik (3) Polizei (1) Portmone (1) Poscht (1) Proschpäkt (1) Rabatte (2) rägne (1) Räuber u Poli (1) Reagiere (1) Rede (1) Reise (1) Rithaue (1) Rock'n'Roll (1) roti Chöpf (1) roti Nase (1) Rubble (1) Sale (1) Sammler (1) Säubschtscänning (1) SBB (1) Schalk (1) Schef (1) schiffe (1) Schlafe (2) Schlafritmus (1) schleppe (1) Schmarfoun (1) Schmartfouns (1) Schmätterling (1) Schnitzelbänke (1) Schnuuf (1) schnuufe (1) schön (1) Schoppe (2) Schopping (1) Schopps (1) Schpar-Tickets (1) Schport (1) Schprach (2) Schtadt (3) schtinke (1) Schtunde (1) Schwarzi Chleider (1) schwätze (1) Schwiz (1) Seel (1) Sirene (1) Smartfoun (1) Songs (2) Soziali Medie (1) spare (1) Spüehle (1) Standardlehrbuech (1) suure Schtei (1) Tanze (1) tanzende Maa (1) Tee trinke (1) Tegschte (1) Tibits (1) Träim (1) Tram (1) Troum (2) Tschöb (1) Tuble (1) über mi (1) über mich (1) überbisse (2) Überdosis (1) üebe (1) ufruume (2) Usdruck (1) Usmischte (1) Usverchouf (1) Värse (1) Värsli (1) Vegi (1) Venedig (1) verchert (1) Versand (1) Verschwörige (1) Verschwörigtheorie (1) verstah (1) Verwanti (1) Verwautigsrat (1) Vorplatz (1) Vorsätz (1) Voumond (1) voupföschte (1) Voupriis (1) Wandere (1) Wärbig (1) Wätter (2) Wäut (2) Wäutungergang (1) Wehguetli (1) Wenn (1) Wiehnachte (3) Wiikend (1) Wind (1) Wirtschaft (1) Wohnig (1) Wösche (1) Wuchenänd (1) Wueche (1) Zahnarzt (1) Zeiche (1) Zmorge (1) Zuekunft (3) Zyt (1) Zytig (2) Zytumschtellig (1)