Dr. Rüedu tweetet - Churzriime - Gedanke-Schnipsel (2021-1)

Dr. Rüedu tweetet - Churzriime - Gedanke-Schnipsel - Usschnitte us Songtegschte (2021-1) 

19.11.2021 - 22.11.2021

Weiss grad säuber nid so rächt, söu i oder söu i nid, oder wirds mir jez eifach grad e chli schlächt

*. *. *. *. *

Mir wärche hert, Tag für Tag pro Wuche u mau e chli meh.

U we eine chunnt u ne Dummi het de tüe mir aus wär nüt gscheh.

Wüe mir aui wüsse ganz genau, dass gwärchet wird ir Stadt und uf em Land - herrgott no mau.

Wär angersch dänkt isch nid ganz ..... ??

*. *. *. *. *

Nur es Biischpieu:

Firma x ghört ar Nestle

d Nestle ghört am Bill Geits

dr Bill Geits ghört am Liebgott

der Liebgott ghört aune

Auso ... gsehsch ?!?

*. *. *. *. *

We me nümm rächt witer weiss.

Wenn alles nur no schwierig isch.

Wenn's tuusig Antworte uf ei einzigi Frag git.

Denn gits Lüüt wo der eifachscht Wäg tüe wähle

U sich mümm wei länger umequäle.

U plötzlech ischs ei einzigi Antwort uf tuusig Frage.

Verschwörigstheorie !

*. *. *. *. *

D'Liebi tuet guet, d'Liebi tuet weh

Du weisch das u wosch gliich geng meh

D'Liebi chunnt u d'Liebi vergeit

Sache entschtöh u angers vergheit

*. *. *. *. *

Dr Mäntig hets nid liecht mit mir

Nach re Nacht voll Tröim vu dir

--------------------

ALLI Rüedu - Tweets

Rüedu uf Twitter

www.twitter.com/@RVuBaern

www.twitter.com/@RVuBaern

Feisbuech - ou als Fratzebuech oder haut äbe als Facebook bekannt

 

Feisbuech

oder ou Fratzebuech oder haut äbe als Facebook bekannt

wird gliebt / wird ghasset

------------------------------------------------------------------

Es isch e virtuelle Schtammtisch u die Lüt wo dert häre gö

chöi liire, ploudere, schimpfe, lobe, lüge, d'Wahrheit säge ...

Lieb oder hinterlischtig si ...

Föteli ineschtelle, Filmli teile ...

sowieso alles teile was so imne Hirni vumne Mönsch Platz het

u i säge euch das isch viel. Mängisch viel z'viel.

--------------------------------------------------------------------

Si chöi sogar gäg das Fratzebuech jammere u chlöne.

Sie chöi schimpfe u tonnere u heilande,

wenn mal e Wortmäldig vu ine gschperrt wird.

U das het äbe meischtes e guete Grund, wo eigentlech aune

bekannt isch. Wües äbe Regle git, wie i jedem Club.

Ja ja .... früecher, a de richtige Schtammtische i de richtige

Dorf- oder Schtadt-Beize het me serig aube eifach

usegschosse. Bis sie wieder vernünftig si gsi u der Ruusch

isch usgschlafe gsi.

--------------------------------------------------------------------

D'Läser u Läserinne chöi virtuell zueschtimmend nicke,

lobe oder gar kei Freud ha u chli tobe.

Eigentlech sehr demokratisch u praktisch. 

So weiss jedi u jede wora är/sie isch.

Fertig. Baschta.

-----------------------------------------------------------------

Jez gits aber serig Schtammtischlinge, wo - chuum het öpper

emau nid die gliich Meinig eifach tüe "entfründe".

Wüe die äbe der ganze Wäut - äme däne wo i däm Fratzebuech

si - wei vorgoukle, dass aui mit ihne iiverschtande si.

-------------------------------------------------------------------

Aber am meischte erschtuunt eigentlech, dass d'Mehrzahl vu

serige Schtammtischlinge nid müed wärde, über ne angäblechi

Verschwörig und Diktatur z'wättere. U sälber eigentlech nüt angers 

aus anti-demokratisch si. Ja das erschtuunt ... ober nid ?

Merksch der Unterschied ? - Gedanke und Fabuliere

Merksch der Unterschied

vu däm ......

• wosch ou no es Herrgöttli
• Chunsch mit uf nes Fürabe Bierli
• Chöit mir es Zwöierli vum Wisse bringe
• Eusle, bring mir doch no es Drüüerli vum gliiche
• Masch no es Schlückli vu däm feine Rote
• So … wär möcht no es Schnäpsli
• Chumm mir gö doch no hurtig ufnes Glesli
• Wei mir no es Wiili ga näh
• Mir vö fang mit amne Haubeli vum Pinot a
• Hopp, ab is Aperöli
• I gloub i ga nomeis ga süüferle

... zu däm

• I hätt garn e Drüüer Cola
• Gärn es Glas Mineral
• Bring mir bitte nomes Glas Milch
• E Haube Mineral
• I ha lieber es Tee oder es Kafi
• E grossi Ovo bitte
• E Warmi Schoggi gärn
• Lieber e Jus d‘Orange
• Gärn e Tomate Saft

Villicht sött me - Gedanke zum Läbe u so

 

Quelle Bild: https://digital-malen.blogspot.com

Villicht sött me

eifach es paar Sache nid so persönlech näh

S'Wätter, Corona, e Tag wo eim alles verheit,

e Situation oder Sorge wo tüe belaschte

Villicht sött me

viel vu däm eifach nümm so persönlech näh

Nid dass me derwäge nümm e Persönlechkeit wäri

ganz im Gägeteil - ganz e schtarchi sogar

Ahnäh, akzeptiere

nid z'viel schtudiere

Eifach s'beschte uns allem mache

nid vergässe wieder mal lache

Ändere was me cha beiiflusse

und alles andre, das blibt dusse

U wes geit tuet Verzicht ou guet ab und zue

Verzicht uf verschwörerischi Theorie

Verzicht uf z'viel Aschtrologie und Hokus Pokus

Verzicht uf Grücht und dumms Gschwätz

Verzicht uf Nachrichte us aller Wält - vum Morge bis am Abe

Eifach s'Läbe näh wie's grad uf eim zuechunnt

und erscht denn luege was alles ändre chasch

wenn wosch

U villicht mues nid immer alles "sinnvoll" si

viellicht wär's schöner eifach nume z'si

glücklech, froh und dankbar z'si

für dass me läbt und eifach so darf si

Zitat Goethe:

„Der Sinn des Lebens ist das Leben selbst."

U viellicht isch für Di glich grad auses ganz andersch - ou guet

Wahr oder ... - Gedicht - Gedanke

 

Wahr oder erschtunke und erloge ?

Grad oder schräg oder ziemli verboge ?

Ehrlech oder eifach nur sehr verloge ?

Mir läbe ire schpezielle Zyt

Und für viel isch das was mau gsi isch jez ziemli wit

Wüll sie vum Läbe so wie sich‘s läbt

Eifach nur überfordret si und chli hilflos si

Und sie flüge ine uf s‘Glafer vu s‘paar Besserwüsser

U meine de no sie chönne frei und sälber dänke

U merke nid dass andri Ungueti sie vu färn tüe länke

Aber es chunnt de scho mau wieder e andri Zyt

Wo‘s Dänke und Füehle füehrt zu minder Strit

Und Theme wo vor guet meh aus me Jahr

Wieder dörfe Theme si - ohni Treychler

Schwitzerfähnli und Verschwörigswahn

So chönnt is si - so wird es si

Denn alles geit einisch zum guete Glück verbi

Und viel wo churz het dörfe si

Wird nur no es Bild vur Erinnrig si

Und ganz vielne wirds ume wieder wohler si

Es isch so schön - Gedicht

Es isch so schön mit dir

Wüll du so bisch wie du bisch

Es isch so schön mit dir

Wüll du mi so chasch nä wie ni bi u gärn wott si

Es isch so schön mit dir

Wüll die Zyt vum zäme si e schöni isch

Es isch so schön mit dir

Wüll ou s‘Alleini-Si für mi guet und gnussvoll worde isch

Es isch so schön mit dir

Wüll i mal da und e mal chli dört

Geng chli bi dir und viel bi mir

Cha si und das find ich unerhört

(Schön und guet)

S‘Zämesi cha viel viel schöner si

Wenn i derbi geng zfriede, glücklech und eifach mi cha si

Danke

S‘Läbe findet - Gedicht und Gedanke

 S‘Läbe findet dusse statt

Zäme mit Dir oder ou alleini

Nid im Facebook, Twitter oder Intenet

Nume dert uss isch Läbe Läbe, nume dert chasch Du frei u d glücklech si

S‘Läbe findet dusse statt

Im Gwüehl vur Schtadt oder i der Stilli ufem Land

Nur dört findsch Du das wo Läbe heisst

A jedem Tag, zu jeder Schtund i neuem Gwand

S‘Läbe findet dusse statt

Viellicht ou no e chli ganz teuf i Dir

Aber sicher nid im Unterhaltigsbrunz vu TiWi (TV) und Radio

Die brucht me nume denn wenn Zyt schteit oder wenns haglet oder schneit

S‘Läbe findet dusse statt

a jedem neue Tag

für Di und ou für mi

wüll s‘Läbe üs zwöi mag

Vum Sinn vum Läbe - Churzgedicht

I frage nid geng nach em Sinn vom Läbe

ga eifach mit ihm am Abe is Bett

U am Morge merke mir zwöi ganz verläge

dass jede vu üs zwöi chli meh dervo wett

Foto:bern dies und das

Vu Beize, Bierli, Tees und der GAFAM - Gedanke

Es isch e so ne Sach afang

Gisch di Name, Mail und Handy

Wed ir Beiz es Bierli, Kafi oder Tee wosch näh

Wo me nächhär em Kanton is Dossier sött gä

Es isch e so ne Sach afang

Dass jez viel Lüt ou da derwäge müesse motze

U meine, dass sig e Terror, das sig zum chotze

Aber jede Tag gisch dini Date, ohni Zögere er GAFAM (*)

avertrousch u merksch gar nid dass du der Afang

vom Terror jede Tag ganz ohni Zwang mit Lächle machsch

ou denn wenn Du di Fruscht uf Compi oder Handy

mit andre „teilsch“ ... du blibsch e Teil vu däm Missstand bis zum Ändi - freiwillig derzue sogar !

 GAFAM - (Google, Amazon, Facebook, Apple, Microsoft) 

Und d‘Moral vu däre Gschicht chönnt si

dass es Lüt git wo schtatt jez es Bitzli chönne glücklech z‘si

sich lieber närve, ärgere u eifach e chli wei wüetig si

Wüll sie meine, dass es sit däm Schiis Virus 

kei Freiheite me würdi gä.

Söue die ihres Bier doch besser bi sich deheime näh.

Nachtrag:

Du chasch so lang nach der „Freiheit“ sueche oder ums sie kämpfe. We Du sie im Chopf und im Härz drinn hesch, denn ersch weisch, dass Du sie gfunde hesch.

Titelbild ausgeliehen bei: https://digital-malen.blogspot.com/

Mir heis doch immer no sehr schön - Gedanke

Mir heis doch immer no sehr schön

D’Velofahrer chöi Velo fahre

D’Töfffahrer chöi Töff fahre

D’Outofahrer chöi Outo fahre

und alli andre chöi loufe oder es Bös oder Isebahn Abi choufe

Mir heis doch immer no sehr schön

D’Filmfäns chöi Filme im Fernseh, vur DVD oder im Chino luege

D’Musigfäns chöi Musig de hei und fasch überall lose (und we si wei ou sälber mache)

D’Läseratte chöi läse dehei oder im Park ufre schöne Matte

und alli andere chöi male, zeichne oder ganz viel Fotis mache oder amne schöne Witzli lache

Mir heis doch immer no sehr schön

D’Konsumänte chöi konsumiere, mit oder ohne viel z’schtudiere

D’Modefäns chöi lädele und d’Ouge i neue Kreazione bädele

D’Lüt chöi ab id Schtadt ga poschte oder vur Poscht vor d’Tür la bringe

und alli andre chöi merke, dass es vu all däne Güeter viel meh het als de bruuchsch u für jede gnue

Mir heis doch immer sehr schön

Die Zfridne und die ganz Unzfridne dörfe im Internet ga schribe und ga liire

Die Wüetige und Ver(w)irrte dörfe gloube was si wei und dervo verzelle 

Die wo meine si sige die wo chönne (frei ?) dänke dörfe jedem Furz de Gloube schänke

und alli andre dörfe mit der Schultre zucke und d’Ufmerksamkeit lieber däm zuewände …

… all däm wo (no) geit und funktionniert

all däne Freiheite wo mir hie hei und jede Tag dörfe gniesse - we mir das wei (und überhoupt no chöi)

wüll eigentlech… mir heis doch immer so sehr schön

und die Lischte da isch erscht der Afang vu all däm wo geit und wo mir no chöi

*.  *.  *.  *. *. *

U jez mau ganz ganz ehrlech u Hand ufs Härz.

Mach mau e Lischte vu au däne Sache wo gö

vu au däne Sache wo Du darfsch

u de vergliichsch mir grosser Offeheit u Ehrlechkeit

mit däne wenige Sache wo nid gö und wo Du sit neuem muesch (eher söttsch, we de e verantwortigsvolle und mitfüehlende Mönsch wosch si).

U de lueg, weli Site lenger isch worde.

Gseehsch !! 😉😊 

U s'schönschte a däre Gschicht ...

... s'wird mit (fasch) jedem Tag besser aus es isch gsi !

s'Foto isch e Leihgab vu

https://digital-malen.blogspot.com

D'Iiladig (i Corona Zyte) - Churzgschicht

Prolog

Vor guet meh als 30 Jahr hei sich i de USA zwöi Päärli glehrt kenne, heis guet u zfride gha, hei immer chönne lache u fröhlech si.

Das het vili vili Jahr häregha. Ching si cho, Bezihigie si usenand, anderi Partner si cho u viellicht wieder gange, aber geng isch öppis blibe hange. E alti Fründschaft. Het är gmeint.

U denn isch Corona cho.

Für alli e schwierigs Thema. Für die einte chli meh.

D'Iiladig, nach sicher 2-3 Jahr ohni grössere Kontakt, eifach wieder mau

Är: Hi "Sie". Wie wärs ... dörft i di mau i mini neu Wohnig iilade zumne chline Zmittag ? Chli ploudere, lache ... was meinsch ? U wieder mau Bärn ... für Di 

Sie: Hallo "Är", merci für Dini Iiladig. Würd mi ja scho fröie di z'gseh. Aber das wär gloub im Momänt chli schwirig. Corona spaltet d Meinige und ou d Mönschheit. I ghöre äbe zu de andere und ha riisig Müeh mit au dene Massnahme und Vorschrifte un i bi sehr skeptisch und gloube nid das das der richtig Wäg isch. Wenn i dini Kommentare im Facebook lise bisch du da ganz anderer Meinig. Drum ischs gloub  besser wenn mer üs nid träffe. Hoffe es wird wider mau anders und d Lag entspannt sech für aui wieder. I hoffe es geit der guet und du gniessisch dini nöii Wohnig. Es liebs Grürssli "Sie"

Är: Liebi "Sie". Danke für dini Antwort. Aber sie überrascht mi doch. Schad. I meine eigentlech, dass me grad inre Zyt, vu däre beklagt wird, dass sich Mönsche usenand bewege, sich vermehrt wieder sött träffe und begägne. Viellicht ou eifach mau es paar Stunde, ohni sich vum Thema Corona u de Massnahme  la z'zerfrässe. Eifach zäme ploudere, lache, vu früecher schwärme u chli brichte. Wül's chönnt guet tue.Vor weniger ausme Jahr het doch d'Mönschheit gwüssgott ou viel schpannendi Theme zum bequatsche gha. I minersits la jedem wo ni guet mag sini Meinig. I schtah aber klar und überzügt zu minere, sött me wölle dervo oder drüber rede. U ganz unter üs, mini chasch Du us es paar Facebook-Kommentare wou chuum richtig erkenne - Facebook isch doch e Plattform voll purer Emotione und reine Schlagwort. Uf beidne Site. Da derzue brüchtis de sicher scho e differenzierteri Darschtellig und Usenandersetzig. I minersits gibe mir Müeh, ou die anderi Site z'akzeptiere. Einersits wüe i kei Tunnelblick wott übercho und wüll i anderersits e Fründschaft nid vu eim enzige Thema möcht abhängig mache. Und ja ... mir geits guet .... und i füehli mi pudeliwohl i mire neue Wohnig ... Liebi Grüess "Är".

U das wärs de wou gsi ! 

Egal wenn und wie Corona z'Ändi geit, irgendwenn mau.

Die Churzgschicht basiert ou uf Gegäbeheite wo sich viellicht tatsächlech zuetreit hei, zmindscht i re sehr ähnleche Art u Wiis oder isch ou die nume erschtunke und erloge ?

VERGISS NID Z‘LÄBE

https://huet-ha-ni.blogspot.com/2020/03/vergiss-nid-zlabe-gedicht.html

S‘Wätter - Churzgedicht

 

 S‘Wätter isch

Mau chli chelter, mau chli wärmer

S‘Wätter isch

So wie‘s grad isch

Wües s‘Wätter äbe Wätter isch

S‘Wätter, das weiss eis

Dass es es paarne gfaut und anderi wär weiss

Findes eher müehsam u chli Scheiss

SWätter cha mache was es will

Es rede alli, ämu fasch

Dervo u sälte isch es schtill

Wenn s‘Wätter nid das macht was me will

Glücklech isch, dass cha me säge

Wär d‘Sunne mag aber ou de Räge

Quelle Bild: https://mattenhofbern.blogspot.com/

Vum Boum - Gedicht

 No isch‘s es Gripp, ja gar Skelet

Dä Boum wo dört uss uf däm Friedhof schteit

No schiint es düschter, ja gar dunkel z‘si

Und trotzdäm weisch, ou die Zyt die gaht schnäu verbi

S‘geit nümm so lang wies gange isch

Und grüeni Sprosse wachse zu grüene Blätter hi

Der Himmel wird blau und d‘Sunne die wird hell und lüüchtig si

Und Du weisch ou denn, dass Gwüssnigs blibt wies geng isch gsi

Viel vergeit, viel vergheit dass Platz da isch wenn Neus entschteit

Neus wo hüt früsch isch und morn viellicht scho Vergangeheit

I allem Neue wo täglech uf der Wält entschteit

Isch ou geng scho der Afang drin vur Vergangeheit

Quelle Foto:  http://bit.ly/3bDLlH8

S‘Cherzli - Gedicht

 

Bi mir dehei da brönnt es Cherzli

Fasch jede Tag und zu jeder Stund

Es lüüchtet und es git e schöne Schiin

Wüll s‘tuet eifach guet, das isch der Grund

S‘Lose u Läse vu schlächte News

Wird zwar nid schöner u ou nid  besser

Doch News si jez eifach News ganz ohni Blues

Dank däne schöne Härz-Schmärz-Wält-Verbessrer

E schöni Schtimmig im Huus, das cha ni säge

Büselet ar Seel, hammermässig und alletwäge

Und i weiss dass du weisch dass i weiss

Dass das Cherzli schiint, für Di und für mi

Hesch scho ghört - Gedicht, Gedanke

Hesch scho ghört

Si si scho bau ume offe

Hesch scho ghört

Das si de gueti Nius

Geisch ines Museum statt Corona Blues

++++++++++

Hesch scho ghört

d‘Kultur chunnt langsam zrügg

Langsam aber Stück für Stück

Bis dass mir wieder drann chöi Freud ha

I Chino, s‘Theater oder anes Konzärt zäme z’ga

++++++++++++++++

S‘isch schön we‘s schöne News z‘fiire git

Zerscht die einte, mir hoffe andri sige nümm so wit

SONNTAG, 16. MAI 2021

Der nächste Internationale Museumstag findet am Sonntag, 16. Mai 2021, statt und behandelt das Thema „Museen inspirieren die Zukunft“.

Suche ein Museum in Deiner Stadt

https://www.museums.ch/ins-museum/museumstag/museumstag.html

Hüt isch - Gedanke

 Am ‚Null acht Null acht‘

Isch der Tag in Bärn scho erwacht

Was für ne Pracht

Und wenn Du useluege tuesch

Zeigts Thermometer schüst grad uf ‚null acht‘

Hüt isch

E chalte Tag

Eine wot villicht gärn dinn blibsch

Wott gärn es warms Tee trinksch

Hüt isch

E schpezielle Tag

Eine wo vu vore und vu hinde

Genau s‘Gliiche wirsch finde

Drum säg i Dir Du chasch es gloube

S‘git kei Zuefäll z‘Bärn unter de Loube

Vu London über Bärn bis Rom

Me redt hüt über das Palindrom

https://www.watson.ch/wissen/300058225-palindrom-tag-warum-ist-der-12-02-2021-so-besonders

Vu Proschpäkte - gedanke

 

Es isch isch ume mau Altpapier bündle Namittag gsi.

Die si eher müehsam aber ou die gö de mau verbi.

U wüll jedes Papierli u Carton no mau i Rüedus Finger si gsi

si viel Gedanke plötzlech Gascht i Rüedus Chopf inne gsi.

Es paar liebi, fründlechi u ou s‘paar schrägi u müehsami

hei wölle i Rüedus Chopf drin blibe.

Und är het nur eis im Sinn gha: die mues i vertribe.

U da si plötzlech ou all die Proschpäkte füre cho

Die vum Coop und ou die vum Denner und der Migros

(Rüedu het de im Fau nüt gäg der Aldi und Lidl)

U Rüedu jet de plötzlech gmerkt, dass är ja gar nümm cha richtig schoppe

I all däne Butigge u Läde. De schöne u de flotte.

U denn het är ou plötzlech gmerkt, dass das ja genau so wie früecher isch

Denn als Chind, wo der Wiehnachtskatslog aube im Birefchaschte gläge isch

und är mit lüchtende Ouge blättret het dert drinne, füre, zrügg u no mau vorwärts

U de ändlech s‘Chrischtchindli cho isch und genau das bracht het

wo är sich sehnlechscht gwünscht het

Aber äbe nume eine vu all däne vielne Buebetröim

Und so dänkt Rüedu de lächelnd für sich

Liebi Läde z‘Bärn i lah öich nach däm Lockdown nid im Stiich

Ou wenni mängisch wett i däne strube Zyte 

Dieses u eis grad bschtelle im Internet

Wo der überlaschtet Pöschtler mir de bringt und i mache jedi Wett

S‘isch halt glich nid s‘gliiche wie im Lade chli umelächle, 

pläuderle u am Änd u s‘Oug i däre schöne Warepracht la bade

U denn erfüllt sich viellicht e alte Buebetroum aber ganz sicher e aktuelle Mannetroum.

Öppis a d’Füess, a d‘Chnoche - Ehrewort - versproche

Oder es feins Tee oder gueti Sache zum deheime choche.

Bis bald !

E guete Tag - Wünsch - Gedanke - Gedicht

 

E guete Tag

Wünsch ich Dir

Eifach so

Und wüll ich dich mag

Viellicht mal eine

E ganz e feine

Ohni News vu diesem u vu däm

E ruehige ganz ohni Lärm

Eine mit viel chline Sache

Wo Du chasch schmunzle

Wo du chasch lache

Weisch ohni Sorge, ohni Runzle

Eine wo Dini Gedanke

Chli chöi ruhig wärde

Eine wo Dini Seel

Fröhlech wird u chli wott tanze

Quelle Foto:  http://bit.ly/3bDLlH8

Der Fernseh - e Frag

 

Der Fernseh ... i frage mi geng, obs schöner u besser isch wenn är louft oder nid ? Am Morge gseh ni das meischtens andersch aus am Abe ...

... u de chas öppe mau vorcho, dass ig mir am Abe wünsche es wär jez grad Morge.

Ohni News und ohni Blues - Gedicht

Der Johnny seit zur Ramona

Chumm mir mache üs mau e schöne Tag

Weisch ohni News und ohne das Corona

D‘Ramona meint druuf zu Johnny

Ja gärn, e schöne, ganz ohni Grumpel

Us em Internet vu däm elände Trumpel

Wo‘s de Abe worde isch nach Schtunde

Hei die zwöi usegfunde

Me chunnt ou ohni News locker über d‘Runde

U sie merke de ufs mau

Ou ohni News bisch ziemlich schlau

u meine z‘friede

Gäu das mache mir gli wieder mau !

Drum probier’s ou Du mau us

So ne schöne Tag ganz ohni News und Blues

Wüll s‘Läbe macht ja eh das wos wott