Aktualisiert: 31. Juli 2022
Dr. Rüedu tweetet - Churzriime - Gedanke-Schnipsel - Gedankeblitze - Usschnitte us Songtegschte - Schnitzelbänk zur Unzyt - Sinnigs und Unsinnigs eifach vur Läbere wäg
Dr. Rüedu dänkt - schribt - teilt - kommentiert
Uf Twitter - nur für Di
Wie verzwiiflet und chli hilflos müesse Mönsche si
Wo der ganz lieb läng Tag nume fruschtriert u wüetig si
Wüll sie merke, dass sie mit ihrem eigete Verhalte
Viellicht ou chli dran beteiligt u mit verantwortlech si
Aber „d‘Schuld“ lieber nöime anders tüe sueche
I rede vum Klima u chönnt grad ou chli toube si u flueche
* *. *. *. *. *. *. *
Es isch Zyt dass mir tüe Farb bekenne
I däne Zyte wo nid eifach si
Es isch Zyt dass mir guet u Bös chöi benne
I däne Zyte wo sehr schwierig für all üs si
Es isch Zyt dass mir säge wo mir tüe häre ghöre
I Zyte wo so schwierig si zum verstah
Es isch Zyt sich a alti Wärte z‘bsinne
Im Wüsse dass mir üs ou uf die chöi verlah
I rede nid vu rächtem Patriotimus u Ghetz
Nume dass du mi tuesch rächt verstah
* *. *. *. *. *. *. *
I bi truurig wenn du truurig bisch
Bi o chli hilflos wenn du hilflos bisch
Isch halt mängisch schwierig wenns so isch wies isch
* *. *. *. *. *. *. *
Zu de „Ereignis“ i der #Brasserie #Lorraine het eine e neui Wortschöpfig zum beschte gäh: Brassismus
Cha me la gäute
* *. *. *. *. *. *. *
Mi Koffer isch trotz sim jugendliche Auter scho rächt säubschtständig. Er het grad d‘Ferie verlängeret. Er blibi sicher no es paar Tag u me wüssi ja nid ….
* *. *. *. *. *. *. *
Rächts - vorwärts marsch
Nomeh vu däne und üsi Wäit isch bau am Arsch
* *. *. *. *. *. *. *
I fordere - u das mit Vehemänz
Der Rücktritt vu däre französische Flugkontrolle
Sofort u ohni längi Tänz
U o vu all däne wo am Berset hei wölle a Chare fahre
Grad bi rächts Rächte gits vu däne gnue, ja gar i Schare
* *. *. *. *. *. *. *
Dusse schpiele Chind
Sie si so fröhlech u tüe lache
Ab und zue de chli e chli es Gschrei
U i frag mi gliich grad - was die ächt für ne Zuekunft hei
We ni so gseh
Was e Teil vum Volch so dänkt u nachschnure tuet
I meine die vur SVP
* *. *. *. *. *. *. *
Wär e Öko Diktatur tuet wittere
sött langsam höre serige Mumpiz no wölle z’twittere
Mit so viel Dräck am eigne Stäcke wärs wohl gschider
im eigne Schtall chli afa umeschmöcke
Zäme apacke und jez ändlech das tue wos scho so lang z’tue gäb
da dra verbi füehrt üs kei Wäg !
* *. *. *. *. *. *. * *
Wurum jammere gägewärtig so viel Lüt über Lüt wo tüe jammere
Wär heiss het dä het heiss u s’paarne isch’s gar z’heiss
Die wo jammere tüe sich a die heilende Chräft vum jammere chlammere
und ou die andre tüe auä witer jammere u so hei alli wieder öppis gmeinsams
Schön - gäu
* *. *. *. *. *. *. * *
Mönsche oh je oh je
Wo hinder allem geng nur Verschwörig gseh
Hei vor allem eis - da bi ni sicher
Glück u Zfriedeheit voll verlore
Mönsche oh Schreck oh Schreck
Wo Politik u Behörde nümm „chöi“ troue
Vergässe eis u das isch tragisch
Die wo am meischte tüe hetze si äbe ou Politik
* *. *. *. *. *. *. * *
Glück als Duurzueschtand isch auä fasch nid zum ushalte.
Drum säg i: i ha es guets Läbe und bi ab und zue glücklech!
I hoffe du ou ?
* *. *. *. *. *. *. * *
Si die guete Zyte jez verbi ?
Si die fette Jahr bald verbi ?
S’isch guet möglech dass das so wird si
Doch i meine und i blibe da derbi
Me cha ou so - mit sich säuber glücklech si
Wenn me s’Glück nid geng nume „usse“ suecht
Sondern teuf i sich inne - und lachet statt fluecht
* *. *. *. *. *. *. * *
D‘Frou Marullo Blocher es isch zum horne
Het kei Ahnig vu nüt u werder vu hinde no vu vorne
Jez söll me em Bund ganz gschnäll befäle
Dass är die Stousee‘s sölli fülle
Ou wenn der Berset ab id Lüft geit
Dert wo der Räge här chunnt ihn kene versteit
Drum isch dä Vorschlag abverheit
* *. *. *. *. *. *. * *
I warne udrücklech vor Mönsche wo duurend sinnläär vor der Press, de Medie, de Behörde u der Politik tüe warne.
Me weiss würklech nid.
* *. *. *. *. *. *. * *
Normalerwiis seit me, dass wenn alli Kurve opsi göh das s‘Zeiche sig vu guete Zyte und fette Jahr, fürwahr.
Doch gägewärtig sis Priise, Temperature und vielne Orte d‘Sorge wo dä Wäg gäg ufe näh
Aber eigentlech wüsse mirs scho sehr sehr lang, was mir alles falsch apackt hei ! Gäu
* *. *. *. *. *. *. * *
Guet ässe … fein ässe … gniesse
Aber immer mit weniger Fleisch
Das geit, ganz guet sogar … weisch
* *. *. *. *. *. *. * *
Wasser spare isch schiints agseit
Wüsst dir wie und wo u sit ou dir bereit
Mir sötte handle i Zyte wo d‘Wält u s‘Klima wandle
Bevor alles der Bach abgeit wo eh kei Wasser meh treit
* *. *. *. *. *. *. * *
Ma sich no öpper vu euch bsinne, was das gsi isch ? FIT MIT JACK
* *. *. *. *. *. *. * *
Hütt nach em Ufschtah si mir ume söfu Idee düre Chopf gange, was me so aues chönnt mache.
U de ha ni mir gseit: du bisch ja nid der „me“. Auso macheni hütt lieber nume öppis, derfür voller Gnuss u Freud.
U du ?
* *. *. *. *. *. *. * *
Bi hütt am Morge am Blickwächsu mit mim Schpiegubild usgwiche.
Chunnt de aube scho wieder.
* *. *. *. *. *. *. * *
S‘Wätter macht was es will
Hei mir öppe aube gseit
Machts Wätter öppe doch das
Wo mir wei dass s Wätter macht
Wüll mir zum Klima nümme Sorg hei
Aber denn, liebi Lüt guet Nacht
* *. *. *. *. *. *. * *
Muuf slouli !
* *. *. *. *. *. *. * *
I bi glücklech we DU glücklech bisch
Gsehsch wie eifach das doch mängisch isch
* *. *. *. *. *. *. * *
I wär sicher scho mindeschtens vier bis füf mau gschtorbe
Hätt i däne Impfgägner u ihrne Prognose wöue gloube
He nu dir liebe - i läbe no
Derfür hets der eint oder ander vu euch wäg gnoh
Ou wenn di das jez villicht chli makaber dünkt
Isch das leider die truurigi Wahrheit
* *. *. *. *. *. *. * *
Ou als Pensionär ga ni am früeche Morge ab und zue ganz gärn ines Tram oder ine Böss (Bus).
I bi drum scho vei e chli guet im schmöcke und rate, welches Deo oder Afterscheif jez grad vor mir oder näb mir steit.
Am Abe geit das wäg au däne Döner Gschtänk äbe nümm so guet.
* *. *. *. *. *. *. * *
Mit em „Meischter“ vum Chriege u Drohe
wei mir doch nid verhandle
chöi mir ja nid verhandle, wenn är säuber gar nid wott
Mir wei Friede u zwar subito
und das ohni Bedingige u Forderige
* *. *. *. *. *. *. * *
Immer wieder frage mi uf Instagram jungi lächelndi Dame
„wie geht es dir“ ? … ziemlech liecht im Tuech
Und i mues de immer wieder zu mir säge
Die weis eigentlech gar nid würklech wüsse
U grad i däm Momänt läng i voll Reflex hinde a mini Hosetäsche
Wott nume wüsse, obs no da isch
* *. *. *. *. *. *. * *
S‘git schiints so Äpps, die chame uf Handys vu Lüt installiere. Die träcke heimlech u du weisch wo sie si.
Has jez ou uf em eigete iPhone installiert. Gäbig. Jez weiss i immer wo ni bi !
* *. *. *. *. *. *. * *
Wes heiss u heisser wird
Dusse wie ou dinne
Chasch jammere, schimpfe oder chlöne
oder di mit me Iistee oder Bier verwöhne
Me cha nid viel ändere, das isch e so
Hätt me vor vielne Jahr scho sölle tue
Ha mängisch z’Gfüehl, die Wält het vu üs Mönsche langsam gnue
* *. *. *. *. *. *. * *
Es bimbelet jez grad s‘Achti Glüt
S‘wär jez de Zyt für nes chlises Znacht
U nachhär … wär weiss das scho oder de halt guet Nacht
* *. *. *. *. *. *. * *
Farbig
Farbig chunnt d‘Wält derhär
Wed farbig dänksch isch mängs farbig u darum nümm so schwär
Wed schwarz/wiss dänksch söttsch luege dass chli Farb dri chunnt
Wüll i säge dir ganz unschiniert - schöner isch es meischtens bunt
* *. *. *. *. *. *. * *
U de ?
Sit dir zwäg ? Sit dir guet druuf ?
Oder seit me druff ?
* *. *. *. *. *. *. * *
Wenn öpper seit: „Ja … aber …“ denn meint är eigentlech nid ja sondern aber.
* *. *. *. *. *. *. * *
A: Was würdisch mache wenn du Diktator wärsch ?
B: Ich würd d‘Diktatur abschaffe
Sorry - Isch nur e Troum …
* *. *. *. *. *. *. * *
Mängisch isch e Sunntig eifach schöner ohni Sunntigs Zytig
Isch doch mängisch der eint oder ander Artikel ziemlich strittig
Für Närve und Seel uf jede Fau viel besser isch
Nüt so beköpplets uf em Zmorgetisch
* *. *. *. *. *. *. * *
Tra ri tra ra
Der Sunntig Morge isch scho da
Nimm‘s eifach gmüetlech und ganz ohni Stress
Viellicht mit Kafi, Züpfe und denn chli well-ness oder so
Dänk eifach no nid a Mäntig - denn ou är isch froh
Wenn är no chli cha warte
* *. *. *. *. *. *. * *
D Wält wär wunderbar
Ohne der Mischt vum Bulewar (boulevard)
Oder tuets gliich guet ab und zue
Chli läse dass die Schöne und die Riiche
Genau die gliiche Sorge hei
Einfach dank viel Chole diesbezüglech frei(er)
* *. *. *. *. *. *. * *
Vieles isch der Bach ab
Viel isch mir abverreckt
Aber i bi ok - jez
Nid aues isch guet gsi
Mängisch isch nur Wuet gsi
Aber i bi ok - jez
Ha mängisch nümme düre gseh
Nume Schmärz u überau tuets weh
Aber i bi ok - jez
* *. *. *. *. *. *. * *
Zyte wärde vermuetlech herter u schwieriger
Was hüt sälbschtverständlech schiint
S wird nid ewig so witer ga
Vieli wärde Müeh ha u das nid verschtah
* *. *. *. *. *. *. * *
S isch Morge
Es isch e früechi Schtund
Und i ha scho zwöi drüü Kaffee gha
Schwarz - aber s Gold tue ni gäng no sueche
Auso mir geit das ewige Gjammer u Gliir vu wäge Schpaltig i der Gsellschaft langsam ziemlich uf e Wecker.
Sit Jahrzähnte si mir gspalte: Migros- oder Coop Chind. Isch ämu gliich gäng gange … oder ?
* *. *. *. *. *. *. * *
Sicher guet driisg Prozänt vu de Mönsche hie umenand wüsse immer no nid was Inflation isch, würde sicher aber uf au Fäu nid dergäge la impfe …
* *. *. *. *. *. *. * *
S‘git Mönsche
S‘git Mönsche die läse
S‘git Mönsche die läse selektiv
Geng nume das wo sie ärgeret u närvt
U däne säg i dass sie gschider öppis angers sötte mache
Oder eifach chli glücklech si und ume mau chli lache
* *. *. *. *. *. *. * *
Es isch fang eifach nume schlimm, meint d‘Frou Grimm
Ja, ja, s‘wird eifach immer schlimmerli, seit da druuf der Herr Zimmerli
Gwidmet allne Jammeri, Wuetbürger, Überalterte, Fruschtrierte
* *. *. *. *. *. *. * *
Wär sich nur mit Gliichgsinnte umgit
Mönsche wie Meinige
Verpasst die anderi Häufti vum Läbe
* *. *. *. *. *. *. * *
Ha ume mau so nes Foti vu eim gseh, dä het sis spotleche Sixpack postet.
Ausu ig ab vor de Spiegel und es Selfi.
I wott das Föteli nid teile. Es Onepack und rächt imposant ! Im Fau.
* *. *. *. *. *. *. * *
I bi richtig verzwiiflet.
I ha vori wie wild ume bletteret uf em Handy
No keis nöis Föteli - no kei neue Biitrag
Zu „üsem“ Michelle Hunziker u ihrne Liebschafte
Nei aber nau.ch !
Isch ächt öppis passiert ?
