Dr. Rüedu tweetet - Churzriime - Gedanke-Schnipsel (2022-05)

Aktualisiert: 31.Mai 2022

Dr. Rüedu tweetet - Churzriime - Gedanke-Schnipsel - Gedankeblitze - Usschnitte us Songtegschte  - Schnitzelbänk zur Unzyt - Sinnigs und Unsinnigs eifach vur Läbere wäg

I bi wahnsinnig gärn irgendwo ire schöne Schwizer Stadt

I gniesse immer wieder d Rueh irgendwo uf em Land

Die Stadt/Land Spalterei vur SVP find i e chli e Souerei

Das findet nur i de Grinde vus paar Hitzchöpf statt

Viel viel (ufrächti) Schwizer hei drum das Ghetz langsam satt

===================

Putin hie u Putin dört

Murer hie u Murer dört

Vieles louft guet u anders gschtört

Aber was die beide grad so biete

Find i - ehrlech  gseit - grad chli unerhört

===================

D Uffahrt isch verbi

Für die einte isch das äbe Uffahrt gsi

Für die andre ä Donnschtig wie vieli andri o

Einfach ohni Büez u darum si sie froh

Dass mir vu Religion und der Chile

Wenigschtens das no bhalte hei

Weisch wichtig isch: eifach e chli frei !

===================

Mach dir keiner Sorge

I bi nur e Momänt e wäg

Mach dir keiner Sorge

U geschter isch verbi u jez isch Morge

Mach dir keiner Sorge

Es schiint das sige die letschte Wort vu dir gsi

U jez isch scho ganz viel Zyt verbi

S einzige was mir blibe isch - si die Sorge - gsi

===================

Sich guet u gross füehle

Cha es cheibe guets Gfüehl für eim sälber si

Solang du das schaffsch ganz us dir säuber use

Ohni dass andi chli u wärtlos machsch

Schön dass ou du das chasch

===================

Dir dörft mir viel wäg nah !

Aber uf Süesses wott i nid verzichte

===================

Es git so Täg

Da nütze ou zwöi drü Kaffee nüt

Wirde eifach nid rächt fit u zwäg

I gloub es geit ou vielne andre so

Doch ou das geit mau verbi - da bi ni uf au Fäu froh

===================

Ha hütt wieder mau die Zetteli u Fötzeli agluegt wo a minere Chüehlschrank Türe chläbe u ghoffet, dass zmindscht d Hälfti mögi säuber abgheie.

===================

Zum Glück isch Glück eifach nume Glück

Wo‘d chasch gniesse ... Stück für Stück

Oder eifach Tag für Tag

Immer denn, wenn‘s Glück Di mag

===================

Geklaut - kopier - geteilt

===================

Wieso chöi eigentlech Männer mit me dicke Ranze und eis zwöi Bier zviel i de Bire eifach so häreschtah und abschätzig über dicki Froue härzieh u läschtere ?

Luege die eigentlech nie i Spiegel ?

===================

„God knows“ - Gott weiss

I frage mi mängisch scho - weiss Gott - ob är würklech alles das wott wüsse wo mir üs wünsche dass ärs sött wüsse

===================

Früecher hets gheisse

Achtung „made in Japan“

Vu däne het me lang nüm ghört

Hüt heissts 

Achtung „made in China“

Gits eigentlech noch Sache und Dinger

Ohni die Made us China oder wirds geng wie schlimmer

Aber äbe … so lang mir alli für fasch nüt wei geng wie meh ha

Heissts äbe

===================

Ha geschter bim wandere so es paar chlini zfridni Chälbli gseh

Ha de zuene gseit: Hüt Abe gits bi mir kei Fleisch

Isch ou hüt no so … weisch

U morn ga ni de äuä wieder chli ga loufe

U luege de was i chönnt iichoufe

===================

D Chue chuehnet

S Huehn hüehneret

S Chalb chalberet

Dr Buur buuret

So verwachets uf em Buurehof

Ou i dr Schtadt geit jez s Läbe los

Nach däm Abschtimmigswuchenänd

Wärs schö

Schtadt u Land gäbte sich d Händ

D Wält ghört allne und d Schwiz nämlech ou

===================

Die wo gö ga wähle und stimme 

Si ou die wo tüe beschtimme

Drum söue die wo nid ad Urne gange si

Der Schnabu halte u ganz schö schtille si

So isch es u so isches geng scho gsi

===================

I ha mir i der Brocki jez e günschtige Fernseh kouft.

Nume dass miner Bsuecher nid meine, i sigi nid normau.

===================

Ha chürzlech wieder so nes Säubschtgpräch gha

Wo die eint Meinig die andri hett im Schiuf la schtah

Drum säg i euch, der chöits mir würklech gloube

Los ou uf die andri Site süsch wird sie ziemlich toube

Erscht mit beidne bisch du das du wo de gärn wettch si

Es isch e so und wird wohl gäng so si

===================

Bi hüt wieder dusse gsi, duss amne See

Dä isch da gsi und het so ta als wäre gar nüt gscheh

I gloube i gange no meh

Aber die Zile ha ni gloub klaut vu eim u vum däm wett i no meh

Musig zum Biispieu

===================

S’Läbe chönnt doch einfach so schön si

zum Biischpieu denn wenns heisst - dä Chrieg isch verbi

S’Läbe chönnt doch einfach so wunderbar friedlich si

wenn aui wo blöd schnure plötzlech für e Friede si

S’Läbe wär doch eifach wunderbar

zum Biispieu ohni dä Putin, das isch doch klar

===================

Auso i bi überzügt, dass es gar keiner Putin Versteher git

Weder uf der Site vu däne wo behoupte dass sie ihn verschtöh

No uf der andere Site bi däne wo ou wei wüsse was är planet, dänkt oder wie chrank är isch

Gö mir aui uf e Kek, we vermuetlech nid mau är säuber’s richtig weiss

===================

Geschter isch geschter gsi

U du hesch gmeint morn sig aus verbi

U wo de morn plötzlech ou geschter isch gsi

Hesch ghoffet dass morn nid so schnäu geschter wird si

Wüe aues einfach nid so eifach cha si

===================

Morn sig aues andersch

Eifach nume no einisch und nume hüt

Morn sig är e andere

Wieder so wie fasch aui andre Lüt

Nume no einisch chli ar Fläsche nippe

Eifach so u nächhär fertig, ohni usflippe

Ou das mal isch das Morn wieder mal vertaget worde

U Fläsche für Fläche si eifach so ghölet worde

===================

Hätt grad e Rieseluscht uf Meer

U sigs ou nume s Näbumeer

Iitouche u chli i andre Gedanke verschwinde

===================

Es schteit i der Zyttig

Für die einte so für die andre grad dise Wäg

Me seit das alles sig rein schpekulativ und strittig

Aber s‘chönnt grad so guet ou eifach schtimme

Aber i blibe tapfer jede Tag

U lise viel so lang i mag

U ha zu vielen mini Meinig u bi lang nid mit allne einig

===================

Mi Schatz heisst zwar nid Rosmarie

Aber trotzdäm i wett es wär scho gli

Dass mi Schatz u ig mit Gitarre u Tamburin

Lieber als mit re Knarre reise via Turin

A Strand wo mir de schmuuse u pfuuse

U tanze zu der Musig wo mir denn hei glost

Wo mir no es bitzli jünger aber nid dümmer

hei dörfe si

===================

Es frage sich gägewärtig scho viel Mönsche i der Schwyz, ob die #Migros würklech ihri Migros isch und wie wärtvoll Du als Chund für die Unternämig bisch ? Proscht !

===================

Zyt - Söll sie blibe schtah oder söll sie witer ga

Zyt - mues me näh so wie sie isch

Mau grad richtig, mau glitschig wie ne Fisch

===================

Samschtig Abe - Wuchenänd

E mau s‘paar Schtündli ohne Händi i de Händ

Häbets guet u gniesset was so z‘gniesse git

Lieber chli use, früschi Luft u es paar Schritt

U de vieu später wieder luege, was los isch u wie wit

===================

Netzfund - geteilt:

===================

Ou wenn‘s morn Sunntig isch

S‘isch der Tag vur Arbeit

Für aui die wo Arbeit hei

U sicher o für die wo Arbeit wei

===================

I bi oft wahnsinnig gärn allei mit mir

Wüe i mi eifach sehr guet ma

I cha mi total guet mit mir allei vertörle

Wües mir mit mir Freud und mi glücklech macht

U nachhär ha ni ume Platz, miner Fründe z‘gseh

Zum lose, schwätze, teile und no viel meh

ALLI Rüedu - Tweets

Rüedu uf Twitter

www.twitter.com/@RVuBaern