Aktualisiert: 30. Juni 2022
Dr. Rüedu tweetet - Churzriime - Gedanke-Schnipsel - Gedankeblitze - Usschnitte us Songtegschte - Schnitzelbänk zur Unzyt - Sinnigs und Unsinnigs eifach vur Läbere wäg
Dr. Rüedu dänkt - schribt - teilt - kommentiert
Uf Twitter - nur für Di
Ferie Summer 2022 - Flüge Summer 2022
Flüge isch e richtigi Herusforderig
I meine natürlech für d‘Passagiere
Scho alleini s‘online bueche mit all däne Zuesatzleischtige
Denn s‘Verchrafte vu de zahlriche Flugstriichige u Stornierige
U am Schluss … isch aues guet gange bis jez
Ab id Schlange u warte, warte, warte, warte
* * * * * * * * * * * * * * * * * * * * * * * *
I ha tröimt, dass dä Troum, dass die freii weschtlechi Wält witerhin e freii weschtlechi Wält blibt kei Troum isch.
* * * * * * * * * * * * * * * * * * * * * * * *
D Natur erwachet jede Morge neu
Jede Tag schmöckt andersch i neuem Liecht
Jede Tag wird begrüesst vu neue Gedanke
A jedem neue Morge bi ni froh bisch du da
* * * * * * * * * * * * * * * * * * * * * * * *
Ha hüt ume mau es paar ganz schöne Säubschtgschpräch dörfe füehre
Tuet immer guet wenn me s‘einte u andere cha loswärde und me weiss
dass da eine isch wo zuelost !
* * * * * * * * * * * * * * * * * * * * * * * *
Ha träumt dass plötzlech aui Lüt eire Meinig sige gsi
Zerscht het das gfägt u scho bau isch das ziemlich längwilig gsi
Für die meischte - wo sich derna gsehnet hei
Dass D‘Lüt wieder unterschieglichi Meinige hei
Ob das jez striite, zangge, chäre oder pläre heisst …
* * * * * * * * * * * * * * * * * * * * * * * *
Het mir chürzlech öpper gschribe
I heig ganz klar öppis gäge d’SVP
Da säg i nume - wunderbar
I däm Fau isch’s jez de aune klar
Das isch kei Fake - ne nei das isch eifach wahr
* * * * * * * * * * * * * * * * * * * * * * * *
Rächt uf Läbe - dank däne Abtribigs-Gsetz
Rächt uf Stärbe - dank däne Waffetrag-Gsetz
Wie verloge du doch worde bisch - liebs Amerika USA
PS: Willkomme dir unerwünschte Chinderli i däre wirre Wält unter em Trump sim Himmelszält
* * * * * * * * * * * * * * * * * * * * * * * *
Was mir aui zäme sötte lehre
S‘isch nümm aues säubschtverständlech so wie mir‘s kennt
Gsundheit, d‘Priise, s‘Klima und Energie
Es chunnt jez d‘Zyt wo weniger zum Alltag ghört
Weniger isch meh - wurum nid ou bir SVP
* * * * * * * * * * * * * * * * * * * * * * * *
We’s di närvt, immer nume über das einte Thema z’läse
Und Du meinsch, dass alli Zyttige nume no voll dervo si
De lies doch eifach nümm !
We’s die närvt, immer die gliich Meinig - so nach dire Meinig - zghöre
Wüll alli nume no gliich gstüüret sölle dänke
De los doch eifach nümm !
* * * * * * * * * * * * * * * * * * * * * * * *
Isches nid immer wieder beidruckend wie tolerant dass gwüssni Intoleranti mit Intolerante si ?
Isches nid immer wieder beidruckend wie intolerant dass gwüssni Toleranti mit Intolerante si ?
Verwirrt ?
* * * * * * * * * * * * * * * * * * * * * * * *
Sit wit meh als zwöi Jahr
Tüe sie fasch täglech u das isch wahr
Jammere, motze, schimpfe, chlööne
U i wott mi da eifach nid dra gwöhne
Verschwörer, Wuetbürger u angeri Glön
Hei vergässe … s Läbe isch doch meischtens schön
Wenn du die nötig Iistellig hesch derzue
* * * * * * * * * * * * * * * * * * * * * * * *
Der schönscht Ort für mi
Fasch magisch
Isch ganz teuf i mir inne
Mit Rueh und mit Musig
Ganz allei für mi glücklech si
Ohni Droge, Alk oder are Pille
Ohne TV, Nachrichte guete wie schlächte
Mit mir säuber zfride si
I mir säuber glücklech si
* * * * * * * * * * * * * * * * * * * * * * * *
Es het sich mängs zum Guete gänderet i de letschte Jahr !
U gliich wirds Zyt dass me i der einte oder andere Partei über Männerquote sött dörfe afa rede.
* * * * * * * * * * * * * * * * * * * * * * * *
#noSVP
Wenn d Wurscht uf em Grill
S wichtigschte i vielne Läbe isch
Und süsch halt eher ruhig und still
Denn fragsch di scho ob du der einzig uf däre Wält bisch
Wo für üsi Zuekunft meh als nur Würschtli will
Aber mir chöi ja gli wieder ga wähle
* * * * * * * * * * * * * * * * * * * * * * * *
Der Mönsch isch
- ämu es paar -
es ziemli eifachs Wäse
S einzige wo die interessiert isch
„Was chunnt uf de Grill“
U nachhär wirds ziemli still
* * * * * * * * * * * * * * * * * * * * * * * *
I ha scho dieses u i ha scho das
Es fählt fasch nümme i mim Zoubertrank
Es fählt nume a chli günschtigem Gas
Dass är cha entwickle si eiget Zoubergschtank
Wüll i hoffe nume eis
U säge, ganz ohni Sch*****
Dä Trank sött dä arm chrank Ma
Dert äne im wite Oschte
Jetzt ändlech la ....
* * * * * * * * * * * * * * * * * * * * * * * *
I reise gärn
Mängisch nach u mängisch färn
I reise viel
Mängisch richtig richtig u mängisch meh als Spiel
I mine Gedanke uf und ab zu Dir
I reise und gniesse mängisch
mit de Ouge zue u mängisch wott is gseh
das wo du für mi bisch u no viel meh ….
* * * * * * * * * * * * * * * * * * * * * * * *
Hätt is denn - du weisch scho wenn
Besser chönne mache
Chasch mirs gloube
I hättis gmacht
U mängisch ha ni ganz wit wit hinde doch no s’Gfüehl
Ou dir geits mängisch es bitzli so
Drum löh mir das jez eifach so wies isch la schto
* * * * * * * * * * * * * * * * * * * * * * * *
Im verchoufe si sie super
Im verchoufe si sie guet
Aber jez mau ehrlech … bruucht das Muet ?
Oder isch es eifach schlicht dumm u voll dernäbe
Im Wüsse dass me (Personal)Problem wird ha
D Lüt la bueche, annuliere u d’ Chunde de eifach ir Schiisse la schtah
Name: Swiss
* * * * * * * * * * * * * * * * * * * * * * * *
Wohäre ghörsch ?
Ja; i meine ganz genau di
Wohäre ghörsch ?
Weisch die Zyte si jez verbi
Wo‘d meinsch irgendwie so chli neutral sig der richtig Wäg
Niene richtig, viellicht chli so oder andersch es anders mal
Mir läbe jez i neue Zyte wo ou du muesch entscheide
Wohäre ghörsch ?
* * * * * * * * * * * * * * * * * * * * * * * *
Ou wei ou wei
S‘söll schtürme, rägne hulde
Ar Pfingschte
Drum blibeni de hei
Denn nume dert geits am ringschte
* * * * * * * * * * * * * * * * * * * * * * * *
Es nachtet duss
I ga jez de grad is Bett
U Morn Morge tagets
I mache jedi Wett
Tröim wärde cho u de wieder gah
Vu de schöne guete cha me nie z viel ha
Die andre laht me irgendwo unterwäs la schtah
Guet Nacht
* * * * * * * * * * * * * * * * * * * * * * * *
Wältwiti Corona Pandemie, Chrieg Russland gäg d Ukraine, globali unufhaltsami Klimaerwärmig - und all das bi loufend stigende Priise.
Wenn veränderisch Du di ? Denn so wie früecher wirds nie meh si !
