Häb e gueti Zyt uf däre Wält. Gniess das wo dir Freud macht u tue niemerem weh. Schänk Freud u Liebi. Schänk Glück u Lache. Irgend einisch chunnts wieder zrügg zu dir uf irgend e gueti Art.
I ha Lüt gärn wo Lüt gärn hei. I ha Lüt gärn wo anderi Lüt ou gärn hei. U nid nume sich. Ou wenn das ou wichtig u richtig isch. I ha mi ou gärn.
I gloube nid gärn a Sache nume wüe sie eim wei Angscht mache dass we me nid dra gloubt e andere Wäg söu vor eim ligge. I gloube nid gärn a ne Gloube wo uf Angscht basiert. I gloube nid gärn a ne Gloube nume wüew i i däm Teil vor Wält gebore worde bi. Das isch Zuefall u der Wunsch vu mine Eltere.
Mir Schwizer heis luschtig Mir Schwizer heis schön Chöi vier mal ad Urne u jede Sunntig id Chile Doch bi beidem gilt leider das wüsse mir all s'het gäng weniger wo wei si blibe lieber dehei im Internet oder süsch irgendwo
Sie jamme lut, sie jammere viel doch lieber jammere als plötzlech ganz still So wüsse mir alli wies usgseht bim Volch so wüsse die obe wenn sie stosse dr Dolch Jammere cha guet tue ar Seel Jammere cha hälfe i der Not Wichtig isch immer dass da öpper isch wo zuelost und häre luegt
Mir sötte meh Liebi mache Mir sötte meh Liebi schänke Mir sötte üs meh häbe u strichle Mir sötte üs meh zuelose oder Gschichte verzelle Mir sötte üs meh gärn ha Alli andere aber ou sich sälber Ja das sötte mir
Mir läbe ire Zyt da si die schlimmschte Tröim ir Nacht ganz harmlos gägeüber all däm was der Tag üs bringt
Es liit mängs schief und im Arge uf däre Wält, grad jez - da muesch nümm lang warte Pass eifach uf dass du nid uf jede Schissdräck inegheisch KI und Fake News nage a üsem Verstand u chöme derhär i Tüüfels Gwand Pass eifach uf - nimm e teufe Schnuf Blib gsund im Körper und im Chopf S'chunnt scho guet
Alt Kontrol Del i probiere‘s no mau u hoffe dass dä boot das tuet wo für d‘Wält, für di, für mi guet u nützlech wär i ha drum s‘Gfüehl dass süsch d‘Bire bald erlöscht mit dir u mit mir ou we mit zwöi das so nid wei
so chas eifach nümme witer ga
Es schneielet es beielet d‘Wält wird wieder still i gniesse das die grossi Rueh ha vu däne schlächte Nius so d‘Nase voll I luege zwar nid eifach wäg I bruche eifach e chli Stille und ou e chli Friede derzue ab und zue
S‘isch ume e Tag ume E länge Tag der ganz lieb läng Tag Rächt wenig Zyt für ne Pouse zum verschnuufe S‘einte Bigeli isch chliner worde U s‘andere chunnt e morn Morge dra Dervor ne e guete schöne Troum Är darf jez cho - i bi parat
s‘isch irgenwie so härzig s‘isch irgenwie so süess Sie loufe mit der Zahlpischtole hinder ihrem Charre Brav tippend, scannend, pipsend und guet erzoge düre Lade Sie si so stolz sie hei so Freud dass sie jetzt a der Selfscan Kasse Chöi istah, warte u de sälber tippe ganz sälber und ohni Fähler
vor Glück tüe sie jetzt ou so lächle wie die us der türre TV Reklame dass alli gseh was sie jez sälber chöi dass alli gseh wie ou sie‘s jez sälber chöi Guet erzoge u gan glücklech Ir Migros oder ou im Coop, bim Aldi oder ou bim Lidl
