Hüt ha ni - Bärndütschi Churzgschichte+Gedanke+Gedicht (Berndeutsche Kurzgeschichten), Tröim, Märli, Värsli u Gedicht us em Autag vu Lüt u Tier u Dings-Da, vu Bärn, vur Schwiz u der ganze Wäut - TABU-FREII GEDANKE, Ploudereie u Säubschtgespräch mau chli so oder haut so oder ganz angersch. Mängisch eifach nur erfunde, erschtunke u erloge u mängisch e chli wahr. Dr. Rüedu verzellt, spinntisiert, fabuliert, laferet, dänkt nache u Du chaschs läse, wett wosch / vum Rüedu oder Gascht-Outore
Es isch vieu Zynismus ume, vieu wird aus sogenannte Witz tarnet u verschteckt
u gar mänge verschteckt sich hinder em Deckmänteli vu Humor, Ironie oder Zynismus.
E ganz e eifachi Möglechkeit, jede Mischt z'schribe u de nächhär säge:
Ja so ha ni das doch nid gmeint, du verschteisch mi nid, du begriifsch das nid,
du hesch kei Humor oder ...
... das isch doch eifach nur ä "Kunschtform" u ir Kunscht mues aues erloubt si.
I meine, das isch eifach nur - oder meischtens - e feigi Haltig, kei Verantwortig für
das z'übernäh, wo so ohni vieu z'überlege häre tipperlet wird u gar mängisch
ha ni s'Gfüeuh, da müess scho am Morge frühe ziemlech vieu Alkohol Aateil
im Abwasser ume schwümme. So dernäbe s'einte u s'andere der här chunnt ...
Gueti Besserig, de einte u andere !
Home-Office schiint ou Näbewürkige z'gäh !
Aber ... s'chunnt scho guet!
Irgendwie und irgendwenn!
Mängisch ha ni s‘guete Gfüeuh es chönn nur no oppsi ga ...
u das mei ni de öppe gar nid ironisch, zynisch oder „humoristisch“ künschtlerisch,
we de verschteisch, was i meine u we‘d druus chunscht. Tschegget ?
Är isch soo chli, so furchtbar unsichtbar ! Dä Virus wo im Momänt die ganzi Wäut umchert und nüt aus ratlosie, überforderti und angschtvolli Mönsche zrügg laht. Mönsche, wo sich i de letschte fette guete fasch problemlose Jahr vum Liebgott und vur Chile abgwändet hei u sich angerne Sache zuegwändet hei. Sig das am Nüt, are Sekte, ar Esoterik, are Verschwörigs-Schuurmärli-Theorie oder wie scho gseit am Nüt. Oder villicht no am Gäud, a de neue fantastische technische Möglechkeite vu Händi oder Internet, oder süsch irgend are schöne und ablänkende Oberflächlechkeit oder gar are Sucht, agfange bi Nikotin u Alkohol bis zu viel schrüberem. Wie ou immer. U de isch är - peng! - da, dä unsichtbar Tüüfu, wo si nem Virus oder Corona säge u wo mir aui - mir aui Hobby-Virologe - probiere z'verschtah und gliich nid chöi begriffe, we das nid mau aui die gschide Experte, Dökter, Virologe u Politiker chöi. U was mache de vili Mönsche i ihrer Verzwiiflig ? Wüe ... öppsi nid verschtah isch schwierig. Es isch so ne Art Kontrollverluscht. D'Situation, dass es nümm im Griff hesch. S’Gfüeh, dass es di im Griff, ja so richtig im Würgegriff het. U das isch schwierig für au üsi Generatione, wo doch ihres ganze Läbe lang verwöhnt si gsi. Nie e richtigi Kataschrophe, nie e globale Notschtand u nie e richtig grosse Mangel, wo weh tuet. U jez isch er är da ... dä Tüüfu. Auso bruucht er es Gsicht und e Name. U da gits jez die Verfüehrer, wo us üsere Unsicherheit ganz eigenützig und luschtvou und i ihrem eigene Interässe nüt anders im Sinn hei, aus üs no unsicherer z'mache. Ou wenn sie säge: Du muesch ufpasse, du muesch kritisch si, du muesch lehre eigeti Meinige z'ha (u denn meine sie dänk ihre Meindig söttsch ha), du meusch kritisch si und so vieu meh. Denn säge si meischtens no. Du muesch das sofort läse, du meusch das sofort teile und ... bitte bitte bitte ... du muesch das aune angere Lüt wo du kennsch mitteile, dass es immer meh söue wärde, wo uf der richtige Site sige. So was vu Chutzemischt und eifach nur schlimm. Sektirerisch u Schtündelizüüg het däm früecher gseit u hüt ischs nid angersch. JA .. u jez fäut no der Name: näme mir zum Biischpieu der Trump oder der Bill Gates. Die hei beid es Gsicht u die cha me bruuche, zum are Angscht (wo mir ja eh scho aui hei) äbe es Gsicht gäh. Ir Politik seit me däm öppe: mit Findbilder schaffe, das vereint d'Lüt und das macht d'Lüt gfüegig. Aui gäge öppis, ou we si gar nüm merke um was es geit. Es git hützutags ou geng no vieu z'vieu Regierige, wo ganz froh si, wenn me es Findbild het, zum vor de eigete Problem abzlänke. I meine de da öppe nid üsi Regierige ir Schwiz – im Fau. U jez tue ni mir e chliini Inkonsequänz erloube u säge eifach - passet uf !! Bitte, bitte, bitte, ... wäm Dir gloubet. Blibet gsund u heit nech gärn.
Was nid nur ihn oder sie grad so fescht BEwegt (S‘chönnt ja si, dass mir alli zäme ab und zue oder immer meh chli Müeh hei, we mir s‘Gfüehl vu Kontrollverluscht hei)
Mir stritte z‘fescht über Zahle
Wie viel Toti, mit oder ohni Virus
Mit oder ohni Obduktion
Und wär wurum weli Statisitk gfälscht het
Mir zangge eidütig voll is Lääre use
We mir anand afö bewiese wele Virolog
Söu Rächt ha oder wele verzellt nur Lug
Ob der Virus ächt söu si oder nur e normali Grippe
Mir hei nie gleehrt eifach das näh so wies isch wües isch
Und das z’mache was Experte üs empfähle und nid geng Sorge mache
Dass üs die höche Dame und Herre vur Regierig
En Seich verzelle. Weisch isch ou für die Lüt sehr sehr schwierig
Das alles richtig z‘BEgriffe und denn die richtige Massnahme z‘ergriffe Wo für alli die richtige sölle si Und weisch, alli Regierige uf däre Wält hei s‘gliiche Problem Und chuum eini vu däne chönnt me derfür verantwortlech mache Dass dä Virus sich uf der Wält ustobt. Und ou wenn der Nostradamus 1551 söll gschribe ha, De Königin mit em Name Korona söll vu China här nach Italie cho zum d‘Wält z‘zerschtöre ... oder so I meine da nume ... es wird scho jez so auergattig komisches Züg gschribe. Wurum söll i da no Zyttigsusschnitte vu 1551 läse oder gar no gloube. U Du ?
Fotos aus dem Zeitalter des Corona Virus – photos in the age of the corona virus
No öppis positivs am Schluss: Es isch scho es ganz es speziells und villicht gar Ou guets Gfüehl. Immer wieder ganz alleine imne Lift s‘paar Stockwärch ufe u de ume wieder gäg abe z‘fahre. Ganz alleini !
Empfählig:
Usgsuechti Artikel us der Press zum Thema Corona und drum herum
Nei ... nid was Du jez dänksch. Die ewig sich wiederholende und tuusig mau abgschribnige Frage vu sogenannt Gägeschtrom schwümmende Freidänker und Hobby Virologe. Wurum isch ir Schtatistik vum Kanton Züri d’Anzahl vu de Tote um 4 niedriger als i der Schtatistik vum BAG ? Tja ... we mir das wüsste – wäre mir de glücklecher i üsere Angscht oder angschtfreier i üsem Unglück ? Und wurum wird Anzahl vu de Genesene i jedere Schtatistik andersch dargschtellt und wurum mässe nid alli Länder nach gliiche Kriterie ? Um üs z beruhige oder viellicht wei sie üs glich meh beunruhige zum üs chönne chnächte und beherrsche, wie es paar „Wüssendi“ meine z wüsse ? I frage mi de aube scho grad chli, was me serige Mönsche ir Schuel alles biibracht het oder ou äbe nid ?
Und wurum het i irgend some Bundesamt nach der Privatisierig vu de Alkoholresärve zum Härstelle vu Desinfektionsmittel irgend eine oder e ganzi Gäng das versiffet u jez hei mir nüüt me, gar nüüt me ? Und wurum behouptet der Bundesrat geng wie geng, dass Maske nüüt nütze. Wües zwenig git ... viellicht ... oder am Änd ganz sicher ? Wär weiss das scho. Aber me darf doch no öppe frage, oder ?
U de gits da Frage wo wahrschiinlich no keine gschtellt het. U derbi wäre das so was vu ufschlussriich und wichtig. Für üs aui. Defititiv.
Es Biischpiel ? Auso ...
Wie het sich sit em Usbruch vur Corona Krise d‘Qualität (we me da vu Qualität cha rede) vum Abwasser entwicklet ?
Nid öppe die, ob jez meh WC Papier drin ume schwümmi. Dä mit em WC Papier hei mir jez hoffentlech aui bald überwunde, so dass jez ou d‘Schpötter ändlech ohne schtrafendi Blicke chöi ga hamschtere. Mir si doch am Ändi gliich aui gliich, irgendwie.
Nei i meine die: wie het sich der Anteil Alkohol i de Abwässer entwicklet. U de no unterschide nach Alkohol vu Desinfektionsmittel vum Händ putze und Alkohol us em Urin. Dä wo d Lüt gsoffe hei. Hesch nid ou scho z Gfüehl gha ab und zu, dass die einte statt klar gseh nume ei Zueschtand kenne ... eifach nume duurbsoffe und zue !?
Ha ghört säge, dass die Lüt gägewärtig am glückleschte si, wo so wenig wie möglech Frage schtelle. Wüeu i hätt ja ou chönne frage, ob der Virus vum Mönsch is Abwasser chunnt, dört i Fisch iidringt und denn über Nahrigschötti i anderi Mönsche und so. Aber das ha ni ja gottseidank nid gfragt. Glücklechi Oschtere u blibet gsund und de hei !
Fotos aus dem Zeitalter des Corona Virus – photos in the age of the corona virus
D‘Sunne schint wüll si jez grad nüt anders cha u wott
Die einte hei dra Freud und andri wirfts grad usem Trott
Wüll sie sich frage und das tuet si scho chli plage
Söll me deheime blibe oder darf mes use wage
Tja d‘Antwort druuf isch u blibt, das mues i säge
Nid eifach, mues jede sälber wüsse mit sim Gwüsse ou bi Räge
I säge eifach nume u das mein ig de öppe ärnscht
S‘geit um meh als nur um Di so isch es und so blibts – no chli
Trotzdäm:
I ga jede Tag a Fluss oder i Wald ga jogge
( u bi dört de fasch alleini )
Mängisch am Vormittag, mängisch früeh am Morge
I mache das nid wülls gsund söll si
I mache das nid wülls söll präventiere
I mache das nid wülls viel andri ou tüe mache
I mache das nid zum andri gseh
I mache das nid zum miner Schrittli zelle
I mache das nid wüls mir längwilig isch I mache das nid zum kontrolliere wär nöcher als 2 Meter isch I mache das nid zum luege wos meh als füüf am Huufe git
I mache das nid wül i süsch depressiv chönnt wärde
I mache das nid wüll i süsch nume würd suuffe, rouche oder Süesses frässe
I maches wülls geil und eifach nume schön isch
( und so viel Spass macht )
Und denn, denn, das cha ni dir säge, ischs ou
... gsund
... präventiv
... sozial ... und vieu tuusig mau besser als Alk, Rouch und Zuckerware
Läse mini Meinig nid und mache ihri schtrube Sache
Ohni mi z‘frage, Tag für Tag und Schtund für Schtund
und tüe e so als sig als richtig und sie hätte Grund
Mit ihrne Meinige und ihrne Entscheide
Es Findbild z‘si für viel vu üs ... und me seit das tües üs allne guet
Es gmeinsams Findbild z‘ha i schtrube Zyte
So luege mir zwar dört guet häre, aber bi andre Sache eifach nid
Und das isch doch genau das wo die beide wei
Es Volk voll vu Empörig, Wuet und Emozione
Drum tue ni lieber luege wie‘s däne Lütli geit wo ni guet kenne
Tue mit ne lose, rede, gränne, lache jede Tag, wül ig sie gärn ... wül ig si mag
Und mini Zyt lieber nid tue vergüde und verduble mit „Promis“ wo gliich mache was sie si umwas sie wei
Weisch ... ou wenn du säuber zwänzg driisg Mönsche kennsch wo glich dänke so wie Du. Der Pabscht blibt der Pabscht u der Trump blibt der Trump. Denn die merke nid, dass du meinsch dass du gschider bisch. Mängisch wärs besser mir wüsste nid so vieu vu Länder u Chünige wo so wit wäg si. Mir hätte de meh Zyt u Ghör für üs säuber u üsi nächschte. I däne herte Zyte.
Häbet Sorg
Blibet gsund u suufet nid z‘vieu Oder läset gschider wieder mau es guets Buech Oder lueget e schöne Film vum Winnetou oder vum Sherlock Holms. Wohl bekomms.
Fotos aus dem Zeitalter des Corona Virus – photos in the age of the corona virus
Corona Gedanke u Tipps vum Rüedu – Teil–8 – Drüedriisg und drü (33+3) ... [2]
S‘gäb schiints Lüt wo‘s deheime chum ushalte. Wüe me ja söu – und das unbedingt – deheime blibe. S‘git Lüt, wo enand nid necher chöme, wie das doch jetzt e grossi Möglechkeit wär, sondern wo sich veritabel afö uf e Wecker und ufs Gäder göh.
Drum hie 33+3 Sache, wo Du deheime chasch mache und eifach o Freud u Schpass chöi mache. Es isch nid guet, nume a das z‘dänke wo grad nid oder nümm möglech u guet isch. Vieu vu de Vorschläg chasch z‘zwöit, mit mehrere Lüt aber/oder ou ganz alleini mache.
Wichtig isch ... es söu Fröid mache ! Oder es söu eifach guet tue und befreie und d’Gedanke e chli ine andri Richtig länke !
— auti Chochbüecher vüre näh, drin ume blättere, Freud ha u die gluschtigschte Rezäpt markiere oder besser no usprobiere um hoche
— mit dini Fründe im Facebook + Co. ufruume. Eifach lösche ou die wo dir nid guet tüe
— die aute Fotoaubum wieder mau füre näh und i däne Zyte schwelge u di a au das erinnere, wo mau isch gsi
— aui Gebruuchsaleitige (Manual) vu dine vieune Grät u Maschineli füre näh, läse, usprobiere und neui Funktione lehre kenne ... u die alte grad ghüddere
— im Internet e Bluemekatalog bschteue, d‘Biudli aluege u Freud ha
— im Internet e Bluemekatalog bschteue, d‘Biudli aluege, us schnide und e Collasch mache
— e Chleiderkatalog im Internet bschteue, düreleuge, der Gluscht la cho, achrüzle was dir gfaut – nüt bschteue u zämerächme wie vieu du gschpart hesch
— einfach mau nüüt, aber ou würklech gar nüüt mache
— auti Schwarz–Wiis Fotografie vürehole, aluege u dir probiere vorzschteue, weli Farb d‘Chleider hei gha, wo d‘Lüt tüe trage
— dir e schöne Lischte mache mit au däne Filme, wo dir je viel bedütet hei
— e Zämeschtellig mache vu de beschte Witze, wo dir grad no so i Sinn chöme
— im Internet oder imne Buech über die grossi Wäut und Vieufaut vo de beschte Tees wos git läse u dir de eint oder ander im Internet bschteue u gniesse
— s‘Gschier und s‘Bschteck neu büschele — was obe isch gsi chunnt abe und umgekehrt
— enand e Gschicht usme Buech vorläse oder verzelle
— enand e Gschicht, wo dir tüet erfinde, verzelle
— churz mau gschnäu zur Türe use u dir säuber lüte. Macht Freud.
— eifach mau häre hocke und nume zum Fänschter usluege u süsch nüt
— afa lehre Note läse, wes no nid chasch
— dis Händy füre nähund i dini Apps wieder mau schön usmischte. E App wo du mehreri Monet nid bruucht het ... furt der,it
— wieder mau richtige Briefe a richtigi wichtige Möns he schribe. Vu Hand uf schönes Papier
— Chleider im Schaft sortiere (nach Farb, nach Auter oder nach „wie lang scho nümme treit“)
— Musig sortiere/ CD‘s oder LP‘s (nach Künschtler, nach Jahr, nach Schtil ...)
— aui Socke kontrolliere u die mit Löcher furt i Chübu
— ufhöre mit Rouche u überlege, weles die schönschti Ersatzsucht chönnt si
— ufhöre mit alkoholische Getränk trinke u überlege, weles die schönschti Ersatzsucht chönnt si
— mit Hilf vure App e neui Schprach afa lehre, so dass für die nächschte Ferie wo de mau chöme grüschtet bisch
— ab und zue d‘Türe uftue und i Gang useschtah u dir säuber lüte ar Tür. Macht Freud. Grad no mau u scho wieder.
— lisme wett chasch, vieu lisme wett chasch
— afa es Tagebuech schribe, mit au däm wo dir im Chopf ume pfüderet
— afa dini Tröim ufschribe am Morge oder denn, wett verwasch u si no weisch — tue chli Hantle vüre näh u Üebige mache (chasch ou alti 1 1/2 Liter Petfläsche mit Wasser fülle) — alli Farbschtift u Bleischift schpitze — Puzzle mache (chasch gäbig im Internet bimne Schwizer (!) Versand huus bschtelle) — Oschtereier färbe, koloriere, aaschmiere u dekoriere
Was unbedingt NID SÖTTSCH MACHE ... u das meini sehr ärnscht:
— Verharmlosigs Videos aaluege (s‘meischte isch eifach nume Brunz u Bschiiss u tuet nüt anders als verunsichere, ou wenn dir vorgloge wird, es tües di beruhige)
— Verschwörigs–Theorie–Gschichtli läse u gloube (die si scho immer chli verloge gsi und nüt anders als unnütz)
— zviel News vu der Sensationspress (Blick, 20min etc.) läse
Scho bau findsch e Fortsezig und wieder ume 33+3 Tipps vum Rüedu
