Hüt ha ni e Troum gha. I ha tröimt i heigi tröimt, dass i mit em Bill Geits telefoniert heig. Auso ha. Agfange het das dermit, dass i gläse ha (einisch meh) dass der Bill Geits befohle (!) het, mi söu jez ändlech dä nöi Impfschtoff vüre rücke u afa teschde, was das Züg tougi. Bi de scho grad chli verunsicheret gsi u mini Fründin Uriella ha ni ja ou nümme chönne frage. Bi de zum Glück de gliich no igschlafe u has ussert zwöi drü mau Bisli Pouse rächt ruhig gha i däre Nacht. Ja mängisch chöi das ruhig füüf sächs mau si und denn isch fertig luschtig mit der Rueh. Henu.
Und denn – peng – isch är da gsi. Auso dä Troum, i vollem Gwand und i voller Grössi.
S‘Telefon het glütet u mi Fründ der Bill isch dranne gsi u het gfragt: wie Gates ?
Irgendwie zwüsche Bärndütsch u Änglisch hei mir chli afa hin und här plöuderle u hei o chli chönne lache vu früecher und üsne gmeinsame Abendteuer mit au däne Beta Versione. Mann, si das aube no Üebige gsi, da würd mänge Junge grad afa überbisse, hüt zu tags. S’igs wies wöu. Es het eis Wort s’angere ergäh u mir si de plötzlech bi de Impfige glandet.
Ha ne gfragt, ob das si vou Ärnscht sig, wöue die haubi Wäutbevölkerig zwangsimpfe. U das sige de scho öppe so zwöi bis drü Milliarde Mönsche. Has grad ghört dürs Telefon wie är schmunzlet. Är het de gmeint: Lue Rüedu, het är gseit. Zwangsimpfe müesse mir nume d‘Impfgägner u Verschwörigs-Fans. U das si gar nid so viel. U we mir de das Grüppli behandlet hei, de chöme aui angere ou no dra ... aber die chöme de freiwillig und ohni Zwang. Ja mir hei no es Zyteli glachet über siner Scherze und sini Popularität. U grad wo mir so chli am usplämpele si gsi seit är ziemlich under Schtress. Sorry Mann, mues grad abhänke, ha ne Konferänz Call mit de Häuptlinge vu Dütschland, Schwiz u Öschterriich. Si wei wieder mau nid so wi ni wott. Mues dr Frou Merkl und Co. auä wieder mau chli d’Chuttle putze. Du weisch ja ? Oh ja ... und wie ni das weis, cha ja schliesslech säubschtändig dänke.
U grad wo ni am verwache bi, da lütets Telefon (quasi als Weckruef, weisch) u der Bill Geits isch dran u fragt: Hey hey Rüedu, wie Gates ? Was i no ha vergässe z‘frage: wie bisch eigentlech mit däm Chip us der Serie 2.1 zfriede ? Tuets nümm so weh im Arm ? Isch ächt Hammer, wie mir hie vu üs us chöi verfolge - was Du machsch u wie und wo du‘s machsch. D‘Version 3.0 wird de no e Rundi besser. De gseh ni o, was du dänksch. Isch gäbig, de chöi mir Telefongebühre spare. U ou wäg der Zytverschiebig. Und übrigens: mis Buech „Die Erde ist so flach wie Flunder“ isch bau fertig. Tuesch es de Probeläse, gäu.
U wäg isch är gsi und jez frag i Di, liebi Läserin u liebe Läser:
Isch die Gschicht ...
( ) erschtunke und erloge
( ) e billige Feik
( ) e veritabli, plumpi Verschwörig
( ) e Unterwanderig vur neue Wältornig
( ) e Usdruck vur Verzwiiflig ir neue Diktatur
( ) würklech e richtige Troum gsi
( ) wahr
Am beschte nume eis Chrüzli mache ... viellicht ganz unde, wes geit. Danke. Und dänn sofort abschicke.Und nid vergässe: Name, Vorname, Handy, eMail ... meh wei mir nid.
Weisch, nume Du weisch, was Dini Wahrheit isch, wäm Du was gloubsch und was Du ohni gross nachezdänke witerverbreitisch und teilsch. Drum meine bösi Zunge, dass vieu gfährlecher als dä Virus all diejenige si, wo vu Verschwörerlis bis Rächtsextrem es gfürchigs Süppli am braue si. Aber mi blibe wachsam. Gäu ! Oder nid ? Das wär jez e Weckruef (!) gsi ... im Fau.
U we du öppe zu däne paar ghörsch, wo immer wieder uf so Verschwörigsgschichtli ine gheie .... denn ... denn bisch nid ganz die einzigi Person, was üs angeri zwar nid grad tröschtet. Aber irgendeinisch lehre mir alli chli zu üsne Ängscht und Verunsicherige z‘schtah, so dass mir so Spinneritis chöi la si. Ja ... wahrschiinlech geit ou das e mau verbi ... irgendwenn ... egal ob mir aui nid oder äbe grad gimpft si.
Alli Corona–Gedanke vum Rüedu
Empfählig:
Usgsuechti Artikel us der Press zum Thema Corona und drum herum
