I reise – Gedicht

I reise gärn

Mängisch naach u mängisch färn

I reise viel

Mängisch richtig richtig u mängisch meh als Spiel

I mine Gedanke uf und ab zu Dir

I reise und gniesse mängisch

mit de Ouge zue u mängisch wott is gseh

das wo du für mi bisch u no viel meh

I reise ab und zue

dert häre wo‘s lut isch u mängisch wott i Rueh

e chli id d’Zuekunft u de wieder id Gägewart

Wüeu dert isch das wo passiert Und i bi derzue parat

Z‘läbe für d‘Liebi, de Gnuss und jetz isch Schluss ...

... mit däm reise u Gedanke la kreise

I packe das wo‘s z‘packe git 

Chume jetz zu dir – Tritt für Schritt

U freue mi a däm wo sich‘s dranne z‘freue git

Lischte mit allne Gedicht

Fröhlechi Wiehnachte und es guets Nöis !

Fröhlechi Wiehnachte

nume s'Beschte im neue Jahr

viel Glück und Zfrideheit im neue Jahr

Proscht 2020

Viel Liebi

viel Erfüllig

viel Zfriedeheit

viel, viel Gnuss

* * * * *

14136 Site–Ufrüef i eim Jahr

Viele Dank allne wo hie verbi gluegt u villicht ou s‘einte oder andere gläse hei !

Toll ... schön ... merci !

— — — — — — —

Die diesjährigi Neujahrs–Charte

https://resli-ferien-reise-blog.blogspot.com/

https://aschiernst.blogspot.com/

— — — — — — 

Bis im Jänner 2020 mit neue Gedicht und Churzgschichte !

Der Bank .. weisch no – Gedicht

Weisch no uf däm Bank

Vum Bänkli ... vum Bänggli ...
Und vu flügende Schmätterlinge irgendwo ir Buuchgägend oder so.

Weisch – irgendwie – hätts fasch vergässe

Denn wo mir zwöi uf däm Bank si gsässe

Üs zum erschte Mau begägnet si

Mann wie schnäu geit doch die Zyt verbi

Zum erschte Mau hei üs üsi Ouge berüehrt

Di Huuch vu Zouber het mi dört verfüehrt

Bi iitoucht i ne neui wunderschöni Gschicht

Drum schribi dir jezt das Gedicht

I mues es säge jetz, i chas jetz gloub ganz offe säge

Ha scho chli höche Puls gha denn und weiss wess wäge

I gloub s‘het mir der Ärmel ine gnoh und no viel meh

S‘het sofort Klick gmacht u s‘isch de eifach um mi gscheh

Weisch – irgendwie – i cha das eifach nid vergässe

Denn wo mir zwöi uf däm Bank am Rhii si gsässe

Üs zum erschte Mau begägnet si

Mann wie schnäu geit doch die Zyt verbi

Probiere ab und zue ... es laht mir eifach keini Rueh

dra zrügg z‘dänke. Schnuufe teuf uus und denn i und tue miner Ouge zue

... und gniesse ! U s‘isch aus wärs grad ersch vor s‘paarne Tage gsi.

Dä Bank und Du, dir sit es Gschänk

für mi ... weisch ! ... dänk

Lischte mit allne Gedicht

Tanz mit mir – Gedicht

Tanz mit mir bis as Ändi vur Wält

Oder bis ufe zum Himmelszält

Küss mit mir die halbi Nacht

U die andri grad ou bis dass der neu Tag erwacht

Schmuus mit mir so äng und zärtlech fiin

Bi Sunneliecht oder zum Cherzeschiin

Tanz mit mir uf däm Wäg wo mir zäme mache

Wo eifach so isch wies isch mit gränne und mit lache

Tanz mit mir bis as Ändi vu däre Wält

Oder bis ufe zum lüchtende Himmelszält

* * * * *

Zum Glück isch Glück eifach nume Glück
Wo‘d chasch gniesse ... Stück für Stück
Oder eifach Tag für Tag
Immer denn, wenn‘s Glück Di mag

Lischte mit allne Gedicht

AHV u Vu Früecher u hütt – Gedicht

Weisch was AHV bedüütet ?

Agända huere voll

* * * * *

Vu früecher u hütt (Gedicht)

Du seisch ... früecher sig aus besser gsi

I meine ... früecher isch aues angersch gsi

Du seisch ... es sig e so u nümm wie aube

I meine ... was isch scho aube allenthalbe

Du seisch ... die Junge hütt hei kei Aaschtand meh

I meine ... serig Sprüch die tüe (mir) nur weh

Du seisch ... die Musig hütt das sig nur Lärm u Seich

I meine ... s‘git so vieu gueti i däne Zyte, weisch

Du seisch ... au die Verbräche u Gwaut vu hütt

I meine ... bi soo vieu Mönsche u Boulvard–Press

chunnt sogar de langsamscht Bärner vei i Schtress

Du seisch ... früecher sig aus besser gsi

I meine ... früecher isch aues angersch gsi

Das isch doch so ? I ämu ... i blibe da derbi

Lischte mit allne Gedicht

Lue mau das da ...

https://aschiernst.blogspot.com/2020/02/aschiernst-denkt-und-fragt-wars-fruher.html

Der Schock

Der Schock sitzt teuf. A däm Morge früeh vom 4. Novämber 2019. Dä Schock het sich so nachhaltig is Gedächtnis ine gfrässe, dass es scho es Zytli bruucht het, bis es wieder obsi chunnt.
Da isch doch i däre Lieblings-Gratis-Zittig vu Rüedu gschande, und das de öppe schwarz uf wiis: "Jeder Achte befriedigt sich bei der Arbeit".
U Rüedu het dänkt: Oh läck Du mir, söfu vieu Lüt si bir Arbeit eifach unzfride und i dämm Sinn ou unbefridigt. Auso weisch die angere siebe vu acht – tschegget ? Drum überau so vieu unufmerksami Bedienig i de Läde u ou süsch wod häre luegsch. Das isch ja eifach nume schlimm. Drumm si söfu vieu Lüt vergrämt und mürrisch i de Tram, Bösse u Züg u gaffe eifach nume glängwilet i ihri Händis u sweipe uf Tinder Froue oder Mann nach links oder rächts oder gugge uf Inschta weli Influänser wieder wele Schmare zum Beschte gäbe.
U erscht nachdäm Rüedu sini Ouge wäg vur Schlagzile bewegt het, da isch ihm es Lichtli ufgange.
Ahaaa, das geit ja nume um Sex und Säubschtbefridigung am Arbeitsplatz i däm Artiku.
Ja denn ... aaausoo ... isch ja nid so tragisch u sini Händ hei hurtig witer bletteret (u öppe nid was du jez grad auä dänkt hesch) u nach witere interesannte Mäudige ume grüblet.
U Rüedu het dänkt. Zum Glück bi ni Früeh-Pensionär. Die Sorge ha ni nümm u verpasst ha ni auä ou nüüt. Aber jetz weiss i ou, wurum Chrigu u Seppu geng ume wieder - u de öppe nid zchurz - uf Tualette gange si. Na ja ... u jetz weiss i ou, wurum si aube de nachhär so chli wie erlichteret dri gluegt hei. Drum isch es guet, geng öppe mau chli i de Tageszittige - ou de choschtelose - umezblettere. Die angere schirbe serigs ja nid. Hei sich offebar nid derfür oder füehle sich z'guet. Wie däm ou sig. Läse bildet.

Ab is .... – wenn (2) – Gedicht

Wenn im Herbscht der Früehlig vor der Türe schteit

Wenn d‘Schmätterlinge flüge ou wenn‘s dusse schneit

Wenn‘s rägnet und du mit jedem Tropf

Wo tropfet gschpührsch vu Fuess bis Chopf

Wenn‘s chli zieht im Buuch und andre Orte

Chasch ganz sicher si, s‘bruucht keiner Worte

Dass das Dings Bums da e Name het

Wo fasch jede und jedi kennt, da druuf e jedi Wett

Und wenn dir nach däm Riim da obe jetzt es Möbelstück

Düre Chopf schwirrt isches Zyt s‘Lämpli z‘lösche und ab is ……

Viellich hütt Abe tutti solo – ganz allei de hei
Oder viellich ... oh ja das wärs ... hütt Nacht s’zwöit u lieber nid allei

Gedicht „Wenn“ (1)

https://huet-ha-ni.blogspot.com/2019/06/wenn.html

Lischte mit allne Gedicht

Pouselos – Gedicht

Es chlises Gedicht zum berächtigte Aaligge nach e chli persönlechem Freiruum

I dänke pouselos a Dini letschte Wort

Vu geschter Abe spät

Oder isch es hütt am Morge gsi

„Mir bruuche ab und zue e Pouse“

Wüeu „vor der Pouse isch nach der Pouse“
Oder isch’s öppe grad äne ume gsi

U das sümslet jez pouselos i mine Ohre

Weisch, ha grad chli Sehnsucht – wie ne Mohre

Drum tue ni halt i däre Pouse

I mine Erinnrige und ar Vorfreud ume schnouse

Ar Vorfreud uf aues Schöne wo de sicher chunnt 
nach däre Pouse ... freu mi so ... mit guetem Grund

Nachwort:
S‘isch doch ou schön
Eifach e chli plange
U de schöne Gedanke nache hange

Und weisch ... es isch u blibt e so
Am schönschte isch‘s geng no zwüsche de Pouse
U nid eifach irgendwo

Lischte mit allne Gedicht

Sie zeigt mir - Gedicht

Sie zeigt mir Liebi

Sie zeigt mir Freud

Sie zeigt's mir jede Tag

Sie zeigt mir e Wäg
i gloub es isch e neue Wäg

Sie zeigt mir Liebi

Sie zeigt mir Freud

Sie zeigt mir wo ni schtah

Sie zeigt mir wo ni chönnti häre gah

Sie zeigt mir Liebi

Sie zeigt mir Freud

Sie zeigt mir mit ihrem schöne Lache

Sie zeigt mir a jedem Tag immer wieder neui Sache

Sie zeigt mir Liebi

Sie zeigt mir Freud
Sie zeigt mir wo ni schtah und wo ni gärn würd häre gah

Lischte mit allne Gedicht

I wott - Gedicht

I wott

(chliises Gedicht über die Mönsche

wo alles wei aber nüüt gä und meine

dass statt gä s'besser sig nume z'näh)

I wott überall s'schnällschte Internet

Aber ja kei Antenne über mire Wohnig und mim Bett

I wott überall freii Chüeh wo dörfe lüte wie si wei

Aber keini vor oder hindrem Huus bi mir dehei

I wott ä Outobahn nach hie u dört u überall

Aber keini dür mis Dorf, Quartier oder näb mim Schtall

I wott es Fescht bi Tag und Nacht, viel Lärm und Schpass

aber fahret ab, verzieht nech - als was rächt isch - aber nid a mire Schtrass

Lischte mit allne Gedicht

I bi voll vu nüt - Gedicht

I bi voll vu nüt

I  bi voll vu läär

Und wünschti dass das nid so wär

I bi voll vu nüt

I bi voll vu läär

Und wünschti dass es so wie vorhär wär

Ha irgendwie grad chli chalt

Es bitzli inne und es bitzli usse

Ha s Gfüehl i sig grad wie imne teufe Schpalt

Irgendwie verlore und ganz ohni Halt

Weiss grad nid wo vore isch und wo hinde

Weiss grad nid wo der Wäg isch wo ni gärn würd finde

Weiss grad nid wo obe isch und wo unde

Weiss es villicht wenn der Wäg isch gfunde 

Wüll nid alli Gedichtli immer nume fröhlech und ufgschtellt chöi si und wüll mängisch, 

nach däm dass es gschribe isch vieles besser wird und so wird, wie's grad söll si

... und wüll alles so schön isch - wenn's wieder schön isch !

Lischte mit allne Gedicht

Mega mega churzi Churzgschicht / Gedicht (2) - la fahre

Hüt ga ni a'd Aare

ga eine la fahre

dänkt der Rüedu, wüe är genau weiss, dass

d'Husärztin bim nächschte Termine wird frage

wie's de so mit em Winde gäng u so ...

Aare-Föteli
32 Aare Wanderige
32 Aare Etappe
am schönschte Fluss nah wo's git
https://resli-ferien-reise-blog.blogspot.com/2018/09/projekt-2018-aarerwandern-4-wandern-der.html


Es witers mega churzes Chrzgschichtli ... vu Zunder
https://huet-ha-ni.blogspot.com/2019/07/mega-mega-churzi-churzgschicht.html

Mega mega churzi Churzgschicht / Gedicht (1) - der Gschwinder

Uf Tinder isch der ender gschwinder
Nachwort: Aber Tinder isch nüt für Chinder


*.  *.  * 

Es bitzeli Erklärig

Tinder heisst Zunder
und dert findsch schöns, guets u ou chli Plunder
oder eifach chli öppis für d'Luscht u der Gwunder

und ja ... ou das gits ...
... schribt doch irgend so ne schöni Frou i de beschte Jahr

„Suche nicht ein Abenteuer mit vielen 
sondern eher viele Abenteuer mit Einem“ !

Isch doch schön ... vum Grundsatz här.

Vur Blueme

Der Rüedu sinniert - irgendwie zwüsche Zmorge-Kaffee wo fein schmöckt und schwarz am beschte isch und em chli umeblööterle und nüt ganz richtig tue. Das si haut o schöni Momänte, wo dörfe gnosse wärde. U plötzlech wandere Föteli am PC vorbi und es isch wieder mau der Momänt vum "Föteli büschele".

U Rüedu fragt sich, ob är u faus ja, was für ne Lieblingsblueme het ?

U plötzlech machts PENG! u si isch da. Schteit eifach da wie us em Nüüt härezoubert u trotzdäm e chli erhofft oder erwünscht - ganz im Gheime - irgendwie. So wie's das haut säute im Läbe git - ou bi angerne Sache.

U Du luegsch u s'isch grad chli aues klar - ou wieder Peng!

Ja was fasziniert de so sehr a däre u nume a däre Blueme ?

Si isch haut eifach mau nume schön u das chame mit angerne Wort weder besser no angersch erkläre. U si isch so fiin, zart und so biegsam u trotzdäm schtarch. Sie bewegt sich ganz andersch als anderi Blueme. Si geit wäg im Wind u chunnt ume zrügg. Üsserscht reizvoll und voller Zouber und Magie. Si schpieut villicht e chli, mit sich und mit Dir und mit auem wo rund ume isch. U serig Schpieu chöi doch ou schön si - eh ja - si schön - we des zue lahsch.

U grad bi däm sinnig sinnleche Verwile vor däm Bieud vu däre Blueme tönt's hinde us em Lutschprächer:

See Me
Feel Me
Touch Me
Heal Me   ....

Acht Wort: eifach - gredi use - ehrlech - u irgendwie gliich e chli mit Teufi ... oder nid ?

U der Rüedu het schier e chli es Abtoucherli. Und Rüedu dänkt no. Wurum ha ni d'Who - denn wo ni bi jung gsi - nid besser beachtet ?

Aber s'isch auä wie bi vielem - es isch nie z'schpät ! Bi auem u geng ume neu.

Vum Fitti, vum Sunntig und vum z'gschnälle Finger (und vur Musig und Musig und Musig)

Geschter isch Sunntig gsi. Genau dä nachme wunderschöne Samschtig Abe. Und är isch es absoluts Desaschter worde. E Kataschtropfe vum schtrübere. Aagfange hets mit amne Finger, wo z'schnäu (Senden) drückt het. U nächhär ... ja das bliibt privat u das isch ou richtig so. Nur eis cha me säge. Es isch nid e Wirbuschturm gsi - es isch e Orkan worde.
U wüe sich Rüedu a däme Sunntig Abe het no chli wöue beruhige, het är sich suber parat gmacht für's Fitti, so irgendwenn na de Achte. Aber die hei eifach nume verschlossni Türe gha.
Auso de haut hüt.
Rüedu packt aues wos bruucht für so nes Schtündli ga schwitze. Ja das schwitze isch haut ou so ne Sach. Eini vu däne Körperflüssigkeite wo Mönsche so wunderbar zu Mönsche mache. Und är schwitzt eigentlech ganz gärn und finds sogar no ganz nätt oder adrett, wenn Mönsche schwitze. S'gäb jez Lüt wo villicht würde säge "sexy". Aber persönlech ischs haut scho. Und es drückt haut gliich irgendwie öppis us u isch ou chli wie nes Signal, wo me ussändet (und empfaht). Mir si haut mängisch ou nur puuri Natur oder so. Aber eifach ohni Gruch - wes geit. Wobi ja ou bim Wii eini vu de Gruchsnote offebar "Pferdeschweiss" heisst. Auso gsehsch.
S'Rennband under de Füess faht afa renne u obe druff der Rüedu, möglechscht im gliiche Tämpo u Schritt für Schritt. Vorne wei d'Armature wüsse "goal" ? U Rüedu dänkt: geit di nüt a. Ha schliesslech ou no s'Rächt uf Privatsfäre u mängisch wott i mache was i wott. Punkt.
Vor de Rennbänder si d'Velo. U grad vor Rüedu höcklet e jungi Frou mit re üsscherscht änge Hose und mit zwene Füdibäcki, wo im Rythmus vur Bewegig hin und här tänzle. Rüedu gseht das u het grad churz chli Freud u meint de: Öppe de nid wöue häre schtarre - gäu. Schtarre isch u bliibt es no-go ... ou wes vu hinger isch.
U scho isch der Blick bi ihrem Nachbar, wo bi öppe zwöi Schtundekilometer auä es Filmli uf sim Handy luegt. E richtigi WSP (wandelndi Schlaf Pille). Meint auä no, är machi däre Hübsche näbe dra no Iidruck. Wobi d'Armmuskle und siner Tatuu si scho beiidruckend. Da gits de öppe nüt z'säge dergäge.
Und uf em Bildschrim erschiint Tamara Funicello u die wo si möge wärde auä schtrahle u die wo si nid möge wärde hert afa schnuffe u sich enerviere. Derbi het si auä eifach ume mau i d'Press wöue, wüe si ja wott kandidiere für e Nationalrat. Aber id Press wei eigentlech aui wo tüe kandidiere. Das isch so normau wie nes Creme im Kafi Creme. U mir läbe ja imne sone wunderbare Land, dass mir Nachrichte ou chöi u vor auem dörfe übergumpe u ignoriere. Mir hei ja die sogenannti Feik-Freiheit oder wie das heisst.
U denn passierts. D' Hereos del Silencio singe u schpile ä schpanischi Rockballade vum fiinschte. Rüedu verschteit nüt vum Tegscht aber eis isch sicher. Es muess vur Liebi, vur Sehnsucht, vur Lideschaft, vur Schönheit - grad vu auem e chli - handle. Ämu sicher nid vur letschte Schtüürrächnig oder vum Umschtand, dass d'Ghüdermanne ume mau gschtreikt hei oder irgendwo so ne Presidänt eis ume trumplet het. Das Lied isch diräkt vu de Ohre ohni grosse Umwäg is Härz u zur Seel inegfreeset.
U es hudlet u rumplet grad ou i Rüedu's Härz u Seel u ihm isch schlagartig klar. Das si Seeleverwandti. Angersch cha das gar nid si. Die verschtöh Di - uf hundert u zrügg.
U chli schpeter geits ab zur Ruedermaschine wo grad frei worde isch. U chuum dert druffe so richtig i Schwung cho, singe Dream Theater der Tegscht "I'm so far away" - "I need to see your face" - "your light shines on my soul" u das freeset - zäme mit em dramatische lideschaftleche Ufbou vur Musig grad dert häre i, wo Lieder chöi Heil bringe oder Schade aarichte. Is Härz. Is Musig-Härz. Is Musiker-Härz. I das Gfäss wo Freud u Schmärz ganz ängi Nachbure si u sich der Platz tüe teile.
U plötzlech isch unde obe und obe wird unde u s'isch grad chli e Schtürmi und es hudle im Ruum. Und es ruederet und der Schnuuf schnuufet u der Pues puesnet ... u de chunnt s'nächschte Lied vu de Uriah Heep u die singe irgendwie vu "Dreams" und "Miracles" und "You gotta give it one minute, One hour, One more day" u de purzlets u d'Gitarre singt u s'ganze Orcheschter isch vei imne Züg inne u ou der Rüedu überchunnts schier.
Ja - u was macht är i serige Momänte. Träningsabbruch, füüf Minüteli früecher aus planet u de hei under Duschi u luege wie die würkt. U bi däm Dusche luegt är no mau uf da unheilvoll Finger, wo aues usglöst het - so ou das Gschichtli da. Aber was wosch, dä Finger da ghört zu mir wie aues angere o, s guete u ou s weniger guete. Cha me nid ändere. Söu ig äch däm Finger no mau e Chance gäh ?

Der Schmätterling - es Gedicht

Der Schmätterling

S’het so wölle si - hätts lieber e chli andersch gha

dass sie fasch der gliichig Schmätterling 

fasch am gliiche Ort am Rügge het gha

ja wo ni das gseh ha 

da ha ni gmerkt u sofort gschpührt

dass ig sie no geng nid ha chönne ganz los la

I ha ne gschriichlet und fiin küsst

und är het mi mit me zarte Flügelschlag

mitgnoh uf sini Reis und da ha ni gwüsst

dä Abe da het zwar so schön agfange

doch i bi de eifach wieder mau chli blibe bhange

i däm wo früecher für mi isch aues gsi

u so gö mängisch die Äbe u Nächt verbi

i sitze da, bi Tee und ohni Wii

und hoffe dass de das mau wird chli andersch si



gwidmet are Situation wo am einte u angere chöi passiere
aber nüt schpezifisches u wahrs ...
... eher symbolisch und us Luscht ar Fantasie



Lischte mit allne Gedicht

Vum Maa, vur Gitarre und vum Bett

Oder lies die vermutelech besseri hochdütschi Original-Gschicht

AschiErnst "Die Nacht, der Mann, die Gitarre und das Bett"

Es isch e ziemlich unruhigi Nacht gsi, die letscht. Es schlaft grad nid so guet im Momänt, wüssti der Rüedu z'prichte. Aber gäge use jämmerle isch nid so sis Ding. Rock'n'Roller si wie sie si. Genau so u nid angersch. Auso konkret: gäg use Picku-hert wie s'Felsmassiv vom Matterhorn u inne weich wie nes Iiscreme bire agnähme Summerwermei. Vou am a de Händ abe loufe. Ja u was macht me de, we me - haubs zmits ir Nacht - kei Schlaf me findet?
Vu linggs nach rächts und/oder umgekehrt ? Kei Lösig. WhatsApp ? we Dir niemer schribt um die Zyt. Lut Musig lose ... geit scho grad gar nid.
Auso de haut eMail läse. Und denn isch är plötzlech da, dä Nieusletter wo verzellt, dass der Santana, auso der Carlos Santana, dä Gitarre-Heud - ämu zminscht früecher - sini Gitarre iiglade het und i sis Bett mit gnoh het. U vum Jimi Hendrix, süsch ja eher ä Wumeneiser, het sone Doku grad s'gliche prichtet. Ja wele Musig-Held äch sünsch no so ... offiziell oder im gheime. Wär weiss das scho ?
Und Musikerinne ? Wie schteits de mit däne ? De chöme am Rüedu ou grad no Frage opsi, wie's de mit de Pianischte u de Drömmer so schteit. Das wäre de doch rächt grosse Näschter wos da derzue bruucht - näbem Teddy-Bär.
Das si de aui die Frage gsi, wo i däre Schtund zwüsche mne Ändi fure Nacht und amne erwachende Tag - verziert mit Räschtene vu Träum u gwürzt mit der Unsicherheit, was de äbe Troum isch gsi u was Dänke - i däre Zyt vum Uebergang.

Gitarre schnarche nid !

U so entschliesst sich der Rüedu - villicht scho ir nächschte Nacht - e erschte süferlige Versuech z'mache. Viellicht zum Afang eifach mau d'Gitarre chli necher zum Bettrand. Vu da chasch sie eifach mau ganz sanft berüehre, aber ou wieder los laa. Anächerig in Rate. Fiin, zart und doch voller Sehnsucht und Begehre. Aber villicht wird der Rüedu ou ir nächschte Nacht trotz däre Hilfestellig u däm Versuech widerum nid so guet chönne schlafe.

Denn findet är haut Troscht und Erholig - oder villicht grad beides - im Fitness-Center oder i der Natur, mit oder ohni Sunneschiin.

Wär jetzt dä cheibe Räge nid gsi, är wär vou bereit gsi, sini schöni E-Gitarre is neue Köfferli z'packe. Ohrhörer mit iiboutem Verschtercher i rucksack u de grad losla mit emne Liedli, villicht gar es Liebesliedli, gwidmet am Läbe, am Lache, ar Föhlechkeit, ar Schönheit u grad no mau ar Schönheit. U ou aune Vögeli und am gurgelnde Wasser am Fluss, wo sicher e chli würde zuelose. Die heis villicht öppe de no gärn.

U jez kreise die schöne Kläng vum Lied "Wish you were here" vo de Pink Floyd sanf de beide offene und erwartigsvolle Ohre entgge und berüehre ... u ume isch si da ... die Sehnsucht, besser chönne Gitarre z'spiele.

Drum heisst s'Losigswort sicher und das zu rächt: Geduld und Warte chönne einersits und üebe anderersits. So wie bi mänge andre Sache ou, der wo sech s'Warte lohnt.

Oder lies die vermutelech besseri hochdütschi Original-Gschicht

AschiErnst "Die Nacht, der Mann, die Gitarre und das Bett"

Wenn / Gedicht

Wenn

Wenn d'Wälle tanze

wenn der Wind fiin striicht

wenn der Räge di nid stört
und s'schön wird i dir inn

wenn schwarz-wiis plötzlech farbig wird
und d'Farbe strahle und diner Begleiter si

wenn Wort wie Musig töne

und Musig di wie nes Chleid umhüllt

wenn Schönheit lächlet
und zum Zouber wird

wenn d'Vögel singe
ou wenn's keini Vögel het

wenn d'Cherzli lüüchte
ou wenn's nid fiischter und dunkel isch

wenn d'Blueme schmöcke
ou wenn keini i der Nechi isch

wenn Zyt kei Zyt me isch

wenn Minute chöi zu Schtunde wärde

und Stunde vieu z'schnäll vergöh

wenn Lächle uf z'mau magisch wird

wenn nümme weisch usserst wenn

denn isch wenn

und "wenn" isch schön

wenn verwachsch und hoffsch
dass wenn nid Troum blibt
denn isch wenn



gwidmet ar Schönheit und am Läbe ganz allgemein
und villicht mau öpperem ganz spezifisch

Gedicht „Wenn“ (2)
https://huet-ha-ni.blogspot.com/2019/06/wenn.html

Lischte mit allne Gedicht

Vum Maa wo tanzet het uf der Schtrass

S’isch no gar nid so lang här, da bi ni amne Schpätnamittag am Buebebärgplatz so Richtig mim Lieblings-Musiglade glüffe. U uf eis mau gseh ni öppe zwöi drüü Meter vor mir e Ma - vu hinge - wo tanzet u so gümperligi Schrittli macht. Ha ne vu hinge öppe so uf füfzgi sächzgi gschezt, Ja är het tanzet für sich allei u so wies gschune het mit Freud.

I ha de chli schneuer afa loufe u wöue luege, ob är äch Chopfhöhrerli i de Ohre het. S’wär ja möglech u vor auem bi nja ou chli gwundrig gsi, öppe de no z’errate, was das für Musig chönnti si.

U da ha ni de sis fröhleche lächelnde Gsicht gseh u zwöi schtrahlendi Ouge, wo eifach so mir nüt dir nüt i die Vorfürablechi Wäut usegluegt hei. U … lue da ! Kei Chopfhörer u kei Musig. Höchschtens Musig im Ohr. U s’Auter het o ziemlech gschtumme, so wie urschrünglech gschetzt.

U jez ? hets mir dänkt. Dä schpinnt doch irgendwie. Däm hets doch chli is Hirni ghaglet. S’isch verruckt. Aber wenn Du mau hesch agfange so mit de Gedanke u Vermuetige, de chasch das ab me Momänt chum me schtoppe bis dass de d’Antwort hesch. Ou wes nume di säuber interessiert - vermuetlech.

Ja - auso - was ? Was jez ? Bi scho chli erchlüpft vu mir säuber, dass ig e tanzende Maa ohni Chopfhörer im Fürabevercher aus Schpinner ischetze, nume wüe är chli das macht wo ni mängisch ou gärn miech aber mi nid troue.

S’schönnt ja si, dass är grad Grossvater worde isch oder villicht gar Vater oder dass är Freud het, wüe är ä Sächser het im Lotto oder villicht ou, wüe är äbe keine het u drum au die Sorge wo denn hesch äbe nid het. Oder villicht isch är früsch verliebt u drum so froh u glücklech oder villicht ou drum, wüe är nümm verliebt isch. Es si de no s’paar angeri Variante dür mi Chopf düre gange ohni dass ig däre Antwort necher cho wäri. Aber eis ha ni gmerkt u das de öppe no düttlech: 

Häb doch eifach chli meh Freud a Lüt wo Freud hei i däm Autags-Bad vu Lüt, wo nume eis hei, e suure Schtei.

Eis, zwöi, drüü, vier, füüf Gehhh

Hüt ha ni mi a Troum vur vordere Nacht zrügg bsinnet.
I bi der Chönig gsi. Der Chönig vur Wäut. U wües da nid no mänge obe dranne git ha ni ou vieu dörfe beschtimme.
Auso ha ni mim Lieblings-Diener gseit, är söui zerscht das 1G, nächhär das 2G, u de druuf das 3G u sofort ou grad no das 4G abschteue. Abschaute fertig Schluss. U s'5G de ou no, aber das pressiert ja no nid so fescht. Gits ja chuum u grad bis nach Süd-Korea ha ni dä arm Ma ja ou nid wöue schicke. Mi söu ja nümm so vieu flüge, wes ou nume e chli geit. U es geit.
Item. Är het gmacht wie befohle u PENG! nümme isch gange uf däre Wäut. Ämu ir Schwitz - am Aafang. S'het grad churz chli ghudlet u gfäzet - denn isch es zerscht schtieu worde u nächhär ... i ha ja gschtuunet:
- d'Lüt si wider Tram gfahre u hei gmerkt, dass es no angeri Lüt git. Die ganz fräche hei die es bitzeli schüüchere aaglueget u glächlet oder blinzlet - ämu chli verläge de scho
- d'Lüt hei wider über d'Schtrass chönne ohne zäme z'putsche
- d'Lüt si wider im Fitness gsi u hei Fitness gmacht ohni WA, FB u au däm Züg
- d'Lüt hei wieder gässe u gmerkt, erschtens dass si ässe u zwöitens was si ässe
- d'Lüt si ar Sitzig wieder gsässe u hei glost oder gschnuret oder hei Strichmännli zeichnet oder grad aues oder dopplet oder nüt - aber si si äme gsässe
- d'Lüt hei uf der Arbeit wieder gschaffet - aui
- d'Lüt hei gmerkt, wär eigentlech aues zur Familie ghört - wow! mir hei ja es Meersöuli
- d'Lüt hei ou gmerkt, wär die richtige Fründe si u dass die ja no läbe - ämu die meischte
- es het ume graschlet im Zug, ir Beiz u deheim - d'Lüt hei wieder richtigi Zittige us Papier gläse u drin umeblätteret
- und die erschte Seminar-Aabieter u Beratigungsbüro inklusive Säubschthilfegruppene mit em Thema "Mis Läbe ohni App - (wie) cha ni das meischtere" si wie übermüetigi Piuzli us Bode use gschosse u hei au däne verzwiiflete nach Erlösig schnappende Mönsche der Wäg us der Hoffnigslosigkeit für tüürs Gäut abote

U grad wo ni chli "Kaffee to go" trunke ha u dä Troum a mir verbi schpaziert isch, ha ni feschtgscheut, dass im Tram d'Lüt anang uf Händi mit 4G tüe schribe, dass 5G vum Tüüfu sigi; u ha gseh, dass ume scho fasch wieder zwöi der Gring zäme gschlage hätte uf em Fuessgängerschreife wüe si wieder nume uf ihres Schpieuzüg glueget hei ...

U da bini würklech ziemlich froh gsi, dass ig nid dä Chünig bi - im richtige Läbe, wo aues tuet abschteue.

Aber ig weiss, dass es in Tat und Wahrheit gar mänge git, wo das gärn wär. Lieber hüt aus morn. Chnopf dreie u luege was passiert wenn nümme passiert !

Aber dir sit ja jez scho es bitzeli vorbereitet ... oder öppe nid ?

Sie si wieder da

Ha gmeint u sogar chli ghoffet, das sie Eitagsflöige sige oder ämu nid länger häre häbe aus so ne gueti Saison lang. U ... oh Schreck ... jez si sie wieder da u de no wie. I rede hie vu de Grillitarier. Weiss geng no nid so rächt, ob das e fasch usgschtorbnigi Dino–Art, e spezielle Grille-Art oder ob das Mönsche us Fleisch u Bluet si. Aber Fleisch schiint s‘Houptthema z‘si ou wenn Gmües sich immer wider chli ine schmugglet, zum die immer grösser wärdendi Schar vu Vegetarier ou mit e chli Verlägeheitsbrichterschtattige z‘nähre.

Si isch auso wider da, die Zyt, wo Grossverteiler mit amne scho fasch wahnhafte Iifer üs armselige Konsumwürmli wei biibringe, dass me im Summer cha brätle. Hallooo ... das wüsse mir doch aui sit mir us em Hoseschiiser Auter use gwachse si. U dass me‘Fleisch oder Gmües imne Lade cha choufe, wüe mir ja kei Jäger u Beerelisammler meh si, das isch üs ou bekannt. Ehrlech ... das schtimmt.

U jez säge si, dass das Grillzüg uf der Holzchole äbe doch vieu besser sig. Ja i däm Fau isch die Chräbsgfahr jez eifach verbi u auä nume e Feik u Scherz vu de letschte Jahr gsi. Ämu bis nächschts Jahr, wenn si üs de säge, mir söue der neu kouft Holkcholegrill grad wider furtschiesse u ume ä subere Gasgrill choufe. So oder so ... das aues geit doch eifach nur um Chole ! Nid die zum füürle sondern die im Portmone. Aber mi si ja aui chli Bsitzer vu däne Läde u drum ou so richtig froh, dass Mänätschment u Marketing üsi Interässe so besorgt u nachhaltig u iifrig tüe verträte. S’geit wie gseit um Chole - um üsi Chole nämlech.

S'Huduwätter u Du

Auso eis wott i scho grad am Afang klar steue.
La Di nid la inezieh - vu däm Wuchenänd Huduwätter.
S'wär eifach nume schad, eine uf Depro z'mache schtatt härestah und däm Hudezügs gredi i sis Gsicht ine lache. Wär si mir de - he ?
Auso - was mache bi däm Huduwätter ?
- Früehligsputzete - wenn nid hüt - wenn de ?
- Im Internet ga luege, weli Aktione i de Läde si, ab nächscht Mäntig "Gig" Giz isch geil
- ändlech wieder mau d'Zimmerpflanze giesse - isch villicht no nid z'schpät
- chli ga google u luege, was es aues für neui Wäutverschwörige git u dir eine abgrinse derbi
- wider mau die ältischti Schärbe (Langspieuplatte oder CD) füre grüble u inezieh
- es auts Fotoaubum füregrüble u luege, wie Du mit zwöufi oder sächzähni usgseh hesch
- wider mau e richtige Brief a öpperem schribe - auso weisch so uf Papier u mit Chugelischriber u nächhär is Kuver u Marke druf u ab die Poscht
- ar Türe näbe Dir oder under oder über Dir ga lüte u luege, wär eigentlech dert wohnt
- luege, ob no zwänzg oder driisg oder meh Ligeschtütze häre bringsch
- eifach e riesigi Freud ha, dass es rägnet - wüeu üsi Böde u üsi Natur bruche Räge - es isch aues vieu z'troche (u we's nid gloubsch de ga ga Bure frage - weisch die, wo ihne ihre Bode so wichtig isch - u üs ja ou).
- gang ad d'BEA u eifach wider mau ga richtigi läbigi Tierli vum Buurehof ga aaluege u villicht ga alänge u überleg Dir de eifach wieder mau (so richtig), wie Fleisch us der Migros oder Coop usgseht, wenn's no läbt
U scho bau isch wieder Mäntig u de isch's uf em Bügu ja völlig irrelevant, ob's dusse hudlet, we's dinne scho gnue tuet. U ou der Schef het haut eifach ou es verschiffets Wiikend gha - u das darf me ruhig merke. Meint är. Die einte si obe u die angere unde. Isch haut so.

Oder eifach es feins Teeli trinke u abwarte - ohni öppis z'tue. U plötzlech gsehsch irgendwo ä schöne farbige Rägeboge.

U eifach geng chli fründlech lächle - nid grinse! - lächle.