Aktualisiert: 28.02.2022
Dr. Rüedu tweetet - Churzriime - Gedanke-Schnipsel - Gedankeblitze - Usschnitte us Songtegschte - Schnitzelbänk zur Unzyt - Sinnigs und Unsinnigs eifach vur Läbere wag
Es feins Stück vu mim Lieblingschueche vum mim Schatz bimne feine Tassli Tee ... i wott jez grad nid viel meh
*******************
Ha grad es Schtelleinserat ir Zytig gseh
Sie sueche imne färne Land
Nid nur eine, nei viel viel meh
Wo Nachrichte dichte, biege und erfinde
Dass eine guet söll da schtah, dä im edle Gwand
Chasch di mälde bi P.U.Tin
*******************
Gar mängem under üs ischs nümm so wohl ir guet Schtube
Wäg däm Chrieg u wäg däre Agression, däre schtrube
Aber viellicht gar ou wüll d‘Schwyz einisch meh hadert u zögeret
Wüll viellicht eine oder viel meh vu däne Oligarche ködert
Mit viel viel Gäld
Isches das würklech wärt ?
*******************
Schämsch Du di
E chli
Schwizer z‘si
E chli
Meinsch o mir sötte e chli meh
Wie die andre si , mit de andre si
U dä vur Neutralität sig i däne Zyte so ziemlich out und voll verbi ?
*******************
Kennet dir e einzige Person wo für dä Putin und dä gwalttätig Imarsch isch ?
Falls ja … de tüet mal mit ihm/ihr rede.
Rede hilft … meischtens
*******************
Gället … dir chöit hoffentlech glich schlafe
Ou wenn sich im Oschte e Diktator und Gwaltwüetige probiert us z‘tobe
Mir wüsse dass wältwit Millione vu Mönsche grad ganz fescht as Volk vur Ukraine dänke
Das beruhigt ganz wenig und doch … oder öppe nid ?
*******************
Es isch gar nid eifach für Chind und Jugendlichi
I däne schwäre Zyte
Zerscht das Virus und die Pandemie
Und jetzt dä völlig unnötig dernäbnig Chrieg vu däm Putin
Und dänn no s‘Gliir vu der SVP
I gloube es mag bau nümm lide, nid no meh
*******************
Seit so ne Superschlaue:
D‘Schwyzer Press sig unterwanderet vum Weschte
Das si de genau die Momänte wo nach em läär Schlücke schwige auä s‘gschitschte isch
*******************
Uf Putin gäbs wärli mänge Riim
Und ou denn wenn wenn‘s französisch usspräche tuesch
Doch bi däm Name u däre leide Gschicht
Ischs mir eigentlech chuum meh ums Riime
Was übrig blibt ähnlech wie denn bir Pandemie
Isch‘s Wort ANGSCHT wo üs nid loslah tuet
Häbet guete Muet - trotzdäm
*******************
Gits öppis schlimmers als die, wo mit fadeschiinige hirnrissige Argumänt us em wohlig warme Schtünli e Chrieg rächtfertige ?
*******************
Üse Bundesrat dä isch immer putzmunter + parat
Alles z‘schtudiere und z’analysiere
U derbi tuet är fasch immer nid jufle und öpe ja nid pressiere
Wenn är schlau wie när isch lang gnue tuet warte
Bruuchts i der Regel ou kei Entscheide me
U so tuet är ou diesmau chuum öpperem weh
*******************
So jez chönnte mir alli - eigentlech
We mir üs das gnau tüe überlege
Eifach chli versueche mau nid d Nadle im Heuhufe z’sueche
Chli zwäg u zfriede si schtatt geng gniete und umeflueche
Verdammi no mau !
*******************
I bi fröhlech, irgendwie chli glücklech und froh
Über alles Schöne und Guete im Läbe und uf der Wält
Und hoffe, dass blibi no lang lang so
Denn es het viel Guets und nid nume Schpält
******************
Da gits so Lüt, die säge, d‘USA legi Weschteuropa uf d Schlachtbank
Na ja … wär so dänkt isch viellicht eifach sälber e chli chrank
Wüll … s‘isch scho immer chli eifacher gsi
Im eigne Näscht chli Dräck hinderla
Statt überlege u mal sälber d Hose abe lah
*******************
Dä Putin chratzts und jucks gloub irgendwo
Är isch so agro ir letschte Zyt
Ar spielt mit Chrieg und sine Muskle oder so
U de gits da bi üs im Land so Lüt, die meine es sig der Weschte wo suechi Strit
Hey Lüt, göht mau ga luege wär euch das vorchöie tuet
U stifte böses Bluet
*******************
Es lütet und bimbelet
Es trychelet vu nach u färn
Nur … nach däre Pandemie het fasch niemer me das Bimbele und Lüte so richtig gärn
Weder vu nach no vu färn
ämu z'Bärn
*******************
I gloube ad Wüsseschaft
U du ?
I gloube dra, dass me us Fähler darf lehre
U du ?
I gloube dass me immer besser wett wärde
Für d Mönsche und für d Ärde
U du ?
*******************
Oh je oh je
Der Bardill macht plötzlech was är will
Wär jedoch gschieder eifach still
Ou är het halt die guete Zyte gseh
Chli Verschwörerli oder gar no meh ?
Die meischte wei ihn so lieber nümme gseh
*******************
Im Zug
Bärn - Oute
Hets ja jedi Mängi
Händy
Oh Schreck wie störe
Die zwöi der hinde wo zäme rede
Söue doch i nes anders Wagon ga verschwinde
*******************
Reihefolg:
- d‘Corona-Massnahme si gfalle
- das tuet ganz viele ganz guet gfalle
- drum bruuchts kei Demos meh vu Wüetige, Verschworne u Rächte
- u drum ou keiner meh vu ganz linggs gäg ganz rächts
Isch doch schön … gäu ?!
Weiss s‘Virus scho, dass d‘Schwizer Freiheit hei übercho ?
*******************
Wenn jez es paar a däne Nomalisierigsmassnahme kei Freud hei
De chönnts doch si, dass das genau die si wo vorhär ou a de Corona Massnahme kei Freud hei gha
Me chönnt meine, dass me cha mache was me wott - es paar blibe verbisse i ihrem Trott
Unzfriede, wüetig, freudlos
*******************
Für die einte isch alles scho bald verbi
Die andre wei u chöi s Trötzele eifsch nid la si
So geit das zue uf däre Wält
Mit oder ohni Chemtrails am Himmuszäut
*******************
Nimm mi i Arm
Häb mi fescht
Gib mir warm
*******************
Der Toucher hofft dass är nach em touche wieder uftoucht
Der Fallschirmspringer hofft dass är nach em Sprung nid z‘fescht ufschlat
Und ou Herr und Frou Normalo hoffe es mögi doch e so cho
Und äbe nid andersch
*******************
Z‘Bärn im Tierpark, ganz ohni Quark
Hets am Sunntig viel Mönsche mit Ching
U serig wo wahrschinlech ou gärn eis hätte
*******************
Im Böss ha ni nach s‘paar mau Türe uf + wieder zue
Fasch nümm gmerkt weles Schmöckiwasser a welem Mönsch ahanget
U de no der Kebab u der Gschtank vu z‘viel Bier und Schnaps
De ha ni halt mal früecher als süsch uf dä rot Chnopf drückt
U bi de halt mal z‘Fues gäge Hei zue
*******************
Auso … mir wird‘s ou nach der Pensionierig nie längeilig.
Ha mir zwöi eMail Accounts iigrichtet.
Bi mau der eint u de wieder der anger.
I säge nech. Da louft öppis der ganz lieb läng Tag.
*******************
Chumm mir wei zäme chli i dä neu Tag ine luege
Mau gschpühre was är üs bringe chönnt
Viellicht la passiere wies dä Tag hüt mit üs mag
Mau eifach eifach chli gwundrig si
U planlos zäme si aus wär nüt derbi
*******************
Auso i säge nech:
Nach 40 Jahr intensivem Tatort Studium und mit ere „I weiss wär der Täter isch no vor de Komissare“ Rate vu über 80 % ha ni mi als Profeiler beworbe. Nid emau e Antwort ha ni übercho !
*******************
Der Sturm dä stürmt
Wüeu är nüt so guet cha wie das
Der Sturm dä chuttet
Wüeu är nüt so gärn macht wie das
Der Sturm git Gas
*******************
Nüt het für geng
S paar Sache gö viel z schnäll verbi
Es sig geng so gsi u so sölls ou in Zuekunft si
Nüt het für ewig
Drum nimm genau dä Momänt für di als wär jez immer
Immer wo nie vergheit
*******************
Es isch grad zwöi vor füfi gsi
Härrgott wie gschnäll geit d‘Zyt verbi
Ersch no grad s‘Zmorge uf em Tisch
Schöckts jetzt ziemli vu bratnem Fisch
D‘Sirene hei hüt ume mau richtig chönne
Die hei gloub Freud gha, i ma nes gönne
*******************
Fies
Mies
Mis
Dis
Para
Dis
*******************
Tröim die chöme u gö de wieder mau verbi
Es paar wettsch bhaute wüe sie eifach nume schön si gsi
Aber jede Troum das muesch jez eifach wüsse
Isch kein verwunschne Prinz, wo du als Frosch chasch küsse
Drum lah all die Tröim la witer zieh
Vergiss die einte und die andre nie
*******************
Der Buur geit hüt früeh is Bett
Nid wüeu är das bsunders gärn wett
D Chüeh si äbefaus scho chli am liege
U der Hofhund het der Chopf uf de Pfote u lächlet zfriede
So schön cha Buureläbe si
Dass die vur Schtadt jez grad chli niidisch si
*******************
Die einte plange scho uf de Früehlig
Die andre plange u wüsse nid uf was
Und die letschte wette ou gärn plange
Nume hei sie äbe no nid dermit agfange
