Vielne Lüt geits nid guet i däne Täg.
Si lide.
Wägem Corona, wäge de Veränderige, wäge de Ischränkige.
U wüe si jez teune Orte e Maske söue a ha vor der Nase u vorem Mu.
U si gäbe däm Virus tschued.
Oder der Regierig.
Oder de Beamte.
Oder em Bill Geits.
Oder em Tüüfu u aune wo mit ihm uf em Chare hocke.
Oder au däne Obere wo d‘Mönsche wöue kabutt mache oder beherrsche.
Das isch schtrubi Ruschtig. Das isch nümme luschtig.
Aui si tschued.
Nume nid si säuber.
Hoppla ... was söu de das jez ?
Söi i säuber tschued si a däre Misere.
Dä schöinnt ja ... aber de wie.
Ja, wie seit de däm ?
Kontrollverluscht.
Aues geit zschnäu ... mi tscheggets nümm.
Vieu z vieu wird gschribe.
Me ma nümm nache u weis nümm was schtimmt
wo i däm Internet gschribe wird.
Drum:
Gang use
Gang a Kiosk
Chouf dir so nes Chünigs Heftli
Lueg d Bildli a u lies die Gschichtli
U du wirsch schnäu vieu zfridener
We du chasch läse
Was all die Chünige u Riiche für würklech grossi Sorge hei
Ja denn, denn merksch, dass es dir ja ganz guet geit. Im Vergliich.
D‘Läde si vou
Du chasch use ... überau
(D‘Natur isch geng no da)
Du darfsch dänke was de wosch
Und du chasch schribe ... fasch aues u dert wo’d wosch
U das tüe andri läse, sich empöre oder Freud ha
Und dir es Feedbäck gä, wo du magsch we de wosch
Und dir Glägeheit gäbe, dis Dänke u Füehle z‘hinderfrage
Wenn du wosch
U plötzlech merksch, dass haut immer no ganz vieu
Sache so si wie si gsi si und du si magsch
Wenn du wosch oder du‘s chasch la si si, wenn du wosch.
Ussert s‘paarne Orte e Maske vor em Gsicht
Läbe mir eigentlech genau so wie vorhär
Und im Reschtorant, Chino oder süsch irgendwo
Si mir villicht gar nid unglücklech
Mau chli meh Platz ha zwüsche üs.
Und Grosskonzärt u grossi Fuessball Spiel
Gits hoffentlich ou baud wieder, ganz ganz vieu.
I wünsche dir vieu Gsundheit u Freud u wenig Schtress
Mit oder ohni Rägebogepress.
